Qırım ve Herson vilâyetiniñ memuriy sıñırında «Çonğar» kontrol keçiş noqtasındaki memuriy hızmet merkezi koronavirus sebebinden martnıñ 23-nden aprelniñ 3-ne qadar işini toqtata.
Bu aqta Herson vilâyetiniñ devlet memuriyet yolbaşçısı Yuriy Gusev bildirdi.
«Kalançak» keçiş noqtasındaki memuriy hızmet merkezi ise yañı cedvel boyunca çalışacaq.
«Bazarertesi ve çarşenbe künleri saat 9-dan saat 16-ğa qadar (üyle teneffüsi olmaycaq) – Çaplınka qasaba şurasınıñ qararına köre», – dep aytıla haberde.
Hatırlatamız, Nazirler şurası Qırım ve Herson vilâyetiniñ memuriy sıñırından keçüv qaidelerini deñiştirdi.
Ukraina aq qorçalayıcıları, Qırımda qayd olğan Ukraina vatandaşları Herson vilâyeti ve işğal etilgen yarımadanıñ memuriy sıñırını keçkende rastkelgen problemleri aqqında tarif etti. Amma Ukraina Devlet sıñır hızmeti Qırım.Aqiqatqa bildirgenine köre, martnıñ 18-nde memuriy sıñırda vaziyet kerginleşmedi.
Vaqtınca işğal etilgen topraqlarnıñ reintegratsiya meseleleri nazirliginiñ martnıñ 17-nde bildirgenine köre, Qırım ve Herson vilâyetiniñ memuriy sıñırındaki keçiş noqtalarından keçüv aprelniñ 3-ne qadar sıñırlandı.
Ukraina Devlet sıñır hızmetiniñ bildirgenine köre, esas Ukrainada qaydı olmağan vatandaşlar keçirilmeycek.
Rusiye FSBsiniñ sıñır idaresi martnıñ 18-nde saat 00-dan başlap «çetel vatandaşlarını» esas Ukrainadan Qırımğa kirsetmey.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
