Çarşenbe künü, fevralniñ 12-nde, «Çonğar» keçiş noqtasındaki hızmet alanında Memuriy hızmet merkezi (MHM) açıldı, dep haber ete Qırım.Aqiqat mühbiri.
Novotroitskoye köy şurasınıñ MHM yolbaşçısı İrina Sobçişenanıñ qayd etkenine köre, memuriy hızmet merkezi fevralniñ 11-nden başlap çalışa. Onıñ aytqanına köre, mında 168 çeşit hızmet kösterile bile.
«MHM tünevinden berli test rejiminde çalışa. Tolusınen çalışamız. Bütün devlet sicillerine kire bilemiz. Tünevin eki Ukraina vatandaşınıñ çetel pasportı resmiyleştirildi», – dedi Sobçişena.
Onıñ aytqanına köre, qırımlılar eñ çoq pasport hızmetlerine muhtac. «Bugün Qırım sakinleri keldi, mesleat aldı. Ümüt etem ki, Çonğar keçiş noqtasında işlerini yapmaq olar içün qolay olur», – dep qayd etti Sobçişeva.
«Çonğar» keçiş noqtasında MHM açılğan soñ Ukraina Yuqarı Radasınıñ insan aqları, işğalden qurtaruv ve vaqtınca işğal etilgen topraqlarnıñ reintegratsiyası boyunca komitetniñ çıqış toplaşuvı başlandı. Anda Veteranlar ve vaqtınca işğal etilgen topraqlar meseleleri naziri Oksana Kolâda, Ukraina Yuqarı Radasınıñ insan aqları vekâletlisi Lüdmila Denisova iştirak etti.
Daa evel Herson vilâyeti devlet memuriyeti, «Çonğar» keçiş noqtasınıñ hızmet alanında «memuriy hızmet kösterilüvine bam-başqa yanaşuvnı kerçekleştirmege» planlaştıralar, dep bildirdi.
Noyabrniñ 15-nde yañartılğan «Çonğar» keçiş noqtasında areket açıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
