Qırımtatar Milliy Meclisiniñ reis muavini, Ukraina halq deputatı Ahtem Çiygoz ve eski siyasiy mabüs Yevğen Panov Berlinge kelip, alman siyasetçileri, ekspert, jurnalistlernen körüşmege ve Kremlniñ ukrainalı mabüsleri aqqında tarif etmege planlaştıra.
«Ukrinform» malümatına köre, noyabrniñ 5-nde olar Ukrainanıñ Almaniya elçihanesinde faallernen körüşti.
«Vaziyetimiz zor ve ortaqlarımızğa işanamız, olarnıñ arasında Almaniya bar – eñ müim soylarından biridir. Almaniya siyasetçilerine irişmek içün siziñ yardımıñız kerek, olar siyasiy mabüsler, esirlerniñ azat etilüvi müim olğanını añlasın, amma bu da küreşimizniñ esası degil. Esası topraqlarımıznıñ keri berilmesi ola», – dedi Ahtem Çiygoz.
Elçihanedeki körüşüvde eski siyasiy mabüsler Aqmescitte SİZOda nasıl körüşkenlerini, nasıl avuştırılğanlarını, apishanedeki şaraitler aqqında aytıp, apiste qalğanlarğa şimdi nasıl yardım etkenlerini tarif etti.
2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoz ve İlmi Umerovnı Türkiyege teslim etti, daa soñra Umerov ve Çiygoz Kyivge keldi. Azat etilgenlerinden berli Rusiye olarnı ne şartnen yibergeni belli degil.
Yevğen Panov sentâbrniñ 7-nde Ukraina ve Rusiye arasında mabüslerni almaştıruv çerçivesinde azat etildi. Qırımda onı «diversiya azırlağanında» qabaatlap, 8 yıl sert rejimli koloniyada qalmasına üküm etken ediler.
