Qırımtatar Milliy Meclisiniñ reis muavini Ahtem Çiygoz Keriç koloniyasında tutulğan ukrain faali Volodımır Baluhqa «qoltutmağa ve onı unutmamağa» çağırdı. Bu aqta o, dekabrniñ 7-nde Qırım.Aqiqatqa ayttı.
«Baluh er kesni yaqın vaqıtta körmege istey. İşğalci akimiyetke qarşı küreşni toqtatmay. Putin (Rusiye prezidenti Vladimir Putin – QA) er vaqıt yañı-yañı qurbanlar tapa, Baluh etrafındaki vaziyet körünmey qala. Oña qoltutmaq kerek, o, bizimdir, kerçek ukrain», – dedi Çiygoz.
Dekabrniñ 4-nde «Qırım aq qorçalayıcı gruppası» Keriç koloniyasında tutulğan ukrain faali Volodımır Baluhqa destek mektüplerini yazmağa çağırdı.
Kreml nezaretindeki Qırım Yuqarı mahkemesi 5 yılğa mahküm etilgen Vladimir Baluhnıñ ükmüni qısmen yımşatıp, onı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
