Ukraina halq deputatı, Qırımtatar Milliy Meclisiniñ reis muavini Ahtem Çiygoz esas Ukrainadan işğal etilgen Qırımğa suv satuv ihtimaliniñ muzakeresi aqqında malümatnı provokatsiya dep adlandırdı.
«Bu bir provokatsiya. Qırımğa suv satmaq nedir? Qırımğamı – kimniñ Qırımına? Ukrainamı? Rusiye «kökten taş» dep ayttı, amma Qırım Ukrainanıñ bir qısmı olaraq qayd etilgen añlaşmanı imzalamaycaq», – dedi Çiygoz Qırım.Aqiqatqa.
O, suv meselesi Rusiye prezidenti Vladimir Putinnen siyasiy mabüslerni deñişim muzakerelerinde «insaniyetlik aqqında demagogiya» olacağından qorqa.
Hatırlatamız, Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, yarımada işğalden qurtarılğanına qadar Şimaliy-Qırım kanalından Qırımnıñ suv teminlevi imkânsız ola, dep işandıra.
Daa evel Ukraina Yuqarı Radasınıñ bücet komitetiniñ yolbaşçısı Yuriy Aristov Rusiye işğal etilgen Qırımğa suv satmaq ğayesi aqqında Azatlıq Radiosınıñ leyhası olğan «Shemı» mühbirine (video 2019 senesi oktâbrniñ 17-nde çıqarıldı – QA) izaat berip ayttı.
Qırımtatar Milliy Meclisiniñ reisi Refat Çubarov bücet komiteti yolbaşçısınıñ ğayesini izaatlap, Rusiye prezidenti Vladimir Putin Dnipro suvını esas Ukrainadan işğal altındaki Qırımğa satuv meselesini «sert bir şekilde kötere bile», dep qayd etti.
Rusiye Devlet Dumasınıñ Qırım deputatı Mihail Şeremet, Rusiye tarafı Dnipro suvınıñ esas Ukrainadan işğal etilgen Qırımğa satuv ğayesine «tek qoltutacaq», dep ayttı.
Bu afta Rusiye kontrolindeki Qırım ükümetiniñ yolbaşçısı Yuriy Gotsanükniñ bildirgenine köre, «Voda Krıma» müessisesinde toplaşuv ötkerildi, anda qırımlılarnı içme suvınen teminlev ve suv teminlev hatlarında onı coymamaq içün qullanılacaq usulları muzakere etildi.
Ukraina akimiyeti işğal etilgen Qırımnıñ suvnen teminlevi tek yarımada işğalden qurtarılğan soñ yañıdan başlatılacaq, dep çoq bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
