İşğal etilgen Qırımda ve qomşu Rusiyede apiske alınğan qırımtatarlarnıñ azat etilecegini beklemek içün Rusiye prezidenti Vladimir Putinge büyük basqı yapılmalı, bu ise bugün yoq.
Bu aqta Qırımtatar Milliy Meclisiniñ reis muavini, Ukraina halq deputatı Ahtem Çiygoz «Prâmıy» ukrain telekanalına bildirdi.
«Şübhesiz, bu doğru malümat, qırımtatarlar yoq (dekabrniñ 29-nda deñiştirilecek şahıslar cedvelinde – QA). Putinnen printsipsiz uzlaşsalar, Putinni Qırımda o qadar raatsızlağan qırımtatarlar bu cedvellerde olamaz, Qırımnı zapt etip olamay. Şunıñ içün mında qırımtatarlarnıñ azat etilmesini beklemek içün farqlı yanaşmalı… Ukraina akimiyetini aytam. Putinge büyük basqı yapılmalı, bugün bunı körmeymiz», – dedi Çiygoz.
Onıñ qayd etkenine köre, Ukraina akimiyeti esirlerni deñişim esnasında bir netice olsun dep, «aşalayıcı usullarnı» qullana. Bugünde-bugün Ukraina ittifaqdaşlarınıñ Putinge yapqan basqısınıñ «o qadar küçü yoq, şunıñ içün, ne yazıq ki, insanlar daa apiste qalacaq», dep yaza kütleviy haber vastası.
«Amma olar ne içün apiste olğanlarını bileler. Olar küreşeler. Olarnıñ maqsadı – Qırımnı işğalden azat etmek, Qırımnıñ kene Ukrainanen beraber olması», – dep qoştı siyasetçi.
Dekabrniñ 29-nda işğal altındaki Ğorlivka yanındaki sıñırda tutulğan şahıslarnı deñişim kerçekleşe.
Dekabrde Parijde «normand formatı» sammiti keçirildi – Frenkistan, Almaniya, Ukraina ve Rusiye liderleri körüşti. Taraflar, Kyiv ve Moskva «er kesni er keske» formulası boyunca şahıslarnı dekabrniñ 31-ne qadar deñişecek, dep añlaşqan edi.
Ukraina prezidenti Volodımır Zelenskıy tutulğan şahıslarnı deñişim dekabrniñ 29-nda olacaq, dep tasdıqladı.
Üç taraflı bağ gruppasınıñ gumanitar alt gruppasındaki Ukraina vekili Valeriya Lutkovskaya, «İlovaysk, Debaltsevodan soñ dört yıl devamında esirlikte olğan balalarnı niayet alıp olurmız», dep bildirgen edi. Al-azırda resmiy deñişim cedvelleri yoq.
Dekabrniñ 23-nde Donbastaki zıddiyetni al etüv üç taraflı bağ gruppası «er kesni er keske» şeklinde deñişimni belgiledi.
Rusiye qoltutqan «DNR» temsilcisi Darya Morozovanıñ dekabrniñ 25-nde bildirgenine köre, olar Ukrainağa 53 insannı berecekler. Onıñ aytqanına köre, Ukraina tarafı «DNR» aydutlarına 87 insannı bermege razı oldı. Bu malümat şimdilik tasdıqlanmadı.
Dekabrniñ 18-nde Ukraina telükesizlik hızmeti Azatlıq Radiosınıñ muracaatına cevap berip, umumen Donbasta Rusiye qoltutqan aydutlarnıñ esaretinde 250 insan buluna, dep bildirdi.
