Qırımtatar Milliy Meclisiniñ reis muavini Ahtem Çiygoznıñ fikirince, Rusiyeniñ «Qırım cemaat palatası» «tanılacaq duşmanlarnı» meydanğa ketire. O, Milliy Meclis azalarınıñ «Qırımdan nefret etkenler» cedveline kirsetilmesini izaatladı.
«İoffe (Grigoriy İoffe, «Qırım cemaat palatasınıñ» yolbaşçısı – QA) yerli ealige duşmanlar bar olğanını añlatmaq kerekligini yahşı añlay. Qırımda duşmanlar tanılmalı, Amerika, Avropa degil. Buña endi alışqanlar, eali bezip, Aksenov, Konstantinov, İoffe kibi soylarına iddiada buluna. Şimdi ise şunı kösterecek olalar – mına baqıñız, ayttıq da, normal yaşayışımızğa Meclis keder ete», – dedi Çiygoz Qırım.Aqiqat Radiosınıñ yayınında.
Daa evel «Qırımnıñ cemaat palatası» Qırımtatar Milliy Meclisiniñ reberleri ve «Qırımnıñ vatandaş qamaçavı» aktsiyasınıñ teşebbüsçileriniñ adlarını Rusiyeniñ yarımada işğalini tanımağan ve Rusiyege qoltutqanlar tarafından «qırımlılarnıñ aqlarını bozğanında» qabaatlağan Ukraina ve Rusiye erbaplarınıñ cedveline kirsetti.
Kreml nezaretindeki «Qırım cemaat palatası», Rusiyeniñ Qırım işğalini tanımağan Rusiye ve Ukraina erbaplarınıñ adlarını toplay, dep bildirgen edi.
Vesiqada Ukraina Yuqarı Radasınıñ sabıq deputatı Andrey Sençenko, Qırım Muhtar Cumhuriyeti ükümetiniñ sabıq reisi, Ukraina Yuqarı Radasınıñ deputatı Sergey Kunitsın, Ukraina insan aqları vekâletlisi Lüdmila Denisova, jurnalist Pavel Kazarin, Vernadskiy Tavriya Milliy universitetiniñ rektorı Vladimir Kazarin, Ukraina Arbiy-deñiz quvetleriniñ sabıq komandanı Sergey Gayduk, Qırımnıñ sabıq iqtisadiyatçısı Andrey Klimenko, jurnalist Aleksandr Yankovskiy, jurnalist tedqiqatları merkeziniñ muarriri Valentina Samar qayd etile. Cedvelge QMC prokuraturasınıñ yolbaşçısı Günduz Mamedov, Qırım ve Aqyardaki Ukraina telükesizlik hızmeti baş idaresiniñ yolbaşçısı Aleksandr Şmitko, QMC ve Aqyardaki Milliy politsiya baş idaresiniñ yolbaşçısı Anatoliy Bahçivanji ve Ukraina prezidentiniñ Qırımdaki daimiy vekili Boris Babin, em de bir sıra Rusiye erbabı, şu cümleden yırcı Andrey Makareviç ve oyuncı Liya Ahecakova da kirsetildi.
