Ukraina ve Rusiye arasında tutulğan insanlarnıñ deñişüvi cuma künü ola bile. Bu aqta Qırımtatar Milliy Meclisiniñ reis muavini, Ukraina halq deputatı Ahtem Çiygoz Qırım.Aqiqatqa avgustnıñ 29-nda bildirdi.
«Menim malümatıma köre, deñişüv cuma kününe planlaştırılğanına dair tahminler bar. Amma tam olaraq aytıp olamayıq, bu Rusiye aqqında degil. Er şey «relste» tura, amma incelikler peyda ola bile», – dedi Çiygoz.
Cumaaqşamı künü, avgustnıñ 29-nda, yañı saylanğan halq deputatı Viktor Medvedçuk Yuqarı Radada olıp, Ukraina ve Rusiye arasında tutulğan şahıslarnı deñişüv muzakereleri devam ete, dep bildirdi.
Kütleviy haber vastaları Rusiye ve Ukraina «33-ke 33» deñişüv aqqında añlaştılar, dep bildirgen ediler. Ukraina prezidenti Volodımır Zelenskıy Ukraina ve Rusiye arasında tutulğan şahıslarnı deñişüvniñ «birinci neticeleri» eñ yaqın vaqıtta olacağına ümüt etkenini bildirgen edi.
Avgustnıñ 29-nda saba rejissörniñ anası Lüdmila Sentsova oğlu uzun müddet içinde ilk sefer oña koloniyadan telefon etmegenini bildirdi. O, er aynıñ soñunda bağğa çıqa eken.
Rusiye kütleviy haber vastalarınıñ malümatına köre, Rusiyede mahküm etilgen ukrainalı rejissör Oleg Sentsov Labıtnangi koloniyasından Moskvağa alıp ketirildi. Advokatı Dmitriy Dinze bu malümatnı ne inkâr ete, ne de tasdıqlay.
