Qırımtatar Milliy Meclisiniñ reis muavini Ahtem Çiygoz Ukrainanıñ bazı vilâyetlerinde cenk vaziyeti vaqtında ilân etildi dep tüşüne.
Bunı o, Qırım.Aqiqat mühbirine bildirdi.
«Qırım ve oña bağlı er şey daa sıcaq ve facialı olacaq. Buña em memleket (Ukraina – QA) içinde, em onıñ tışında er kes azır degil. Soñki vaqıtları prezidentniñ Ukraina cenübinde yapqan areketleri mantıqlıdır. Cenk vaziyeti vaqtında ilân etildi dep tüşünem», – dep qayd etti Çiygoz.
Onıñ aytqanına köre, bazı Ukraina siyasetçileriniñ konstruktiv baqışları vaqtınca işğal etilgen Qırım ve Donbasnıñ ayrı topraqları işğalden qurtulacağına ümüt bere.
«Yuqarı Radada bazı fraktsiyalarnıñ (BÜT, Lâşko fraktsiyası ve digerleri – QA) (cenk vaziyeti ile bağlı – QA) yayğarası, menim fikirimce, Rusiye tesirinden kele. Meselâ, Andriy Sadovıynıñ (Lviv şeer yolbaşçısı – QA) konstruktiv baqışları Qırım, qırımtatarlar ve işğal etilgen topraqlarda diger Ukraina vatandaşları içün – işğalden qurtulma ümütidir», – dep qayd etti Çiygoz.
Cenk vaziyeti on vilâyette ilân etile – Odesa, Mıkolayıv, Herson, Zaporijjâ, Lugansk, Donetsk, Sumı, Harkiv, Çernigiv, Vinnıtsâ vilâyetlerinde.
«Urâdovıy Kuryerniñ» noyabrniñ 28-nde çıqqan sanında Ukrainanıñ bir sıra vilâyetinde cenk vaziyeti ilân etilicegi aqqında prezident fermanı derc etildi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Noyabrniñ 27-nde Rusiye kontrolindeki Aqmescitniñ Kiyev rayon mahkemesi tutılğan 24 Ukraina askerinden 12-sini apiske aldı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
