Qırımtatar Milliy Meclisiniñ reis muavini Ahtem Çiygoz martnıñ 15-nde BM Havfsızlıq şurasında Rusiyeniñ Qırım işğaliniñ beşinci yılına bağışlanğan mahsus toplaşuvında çıqışta bulundı. O, Rusiye Qırımğa ordu kirsetken 2014 senesiniñ adise-vaqiaları, Rusiye uquq qoruyıcılarınıñ yarımadada Ukraina vatandaşlarını taqip etilüvi aqqında tarif etti. Çiygoz toplaşuvda olğan Rusiye vekillerine hitap etti.
«Bugünde-bugün Ukraina ve Qırımda yapqan cinayetleriñiz içün cevap bereceksiñiz. Yüz biñlernen ananıñ közyaşını sizge iç bir vaqıt afu etmeycekmiz. Balalarımıznıñ yetim qalğanını ve bugünde-bugün vatanımda barışıqsever sakinlerge qarşı yapqan terror intiqamını iç bir vaqıt afu etmeycekmiz. Sizni iç bir vaqıt afu etmeycekmiz. Ne qadar vaqıt keçse keçsin, cevap bereceksiñiz», – dedi Çiygoz.
O, yarımadada repressiyalar devam etkenini ve insan aqları bozulğanını hatırlatıp, al-azırda işğal altındaki Qırım «bütün Qara deñiz havzasında, Avropa Birliginde vaziyetni kerginleştirüv yeri» ola, dep qayd etti.
Rusiyeniñ Qırım işğaliniñ beşinci yılına bağışlanğan BM Havfsızlıq şurasınıñ mahsus toplaşuvında çıqışta bulunğan Ukraina Tış işler naziriniñ muavini Serğiy Kıslıtsâ Rusiyege qarşı tirenüv ne qadar az olsa, o qadar çoq o, halqara qaide ve normalardan çetleşe, dep ayttı.
Martnıñ 15-nde BM Havfsızlıq şurasında «Timsaliy san: Rusiyeniñ Qırım işğaliniñ başlanğıç yıllığı: halqara uquqnıñ bozuluvı» mahsus toplaşuvı keçirildi.
Halqara toplulıq Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey.
Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
