Çikagoda 2014 senesinde Qırım ilhaqına qol tutqan Rusiye jazzmanı İgor Butmannıñ kontsertini lâğu ettiler. Bunı Qırım.Aqiqatqa jurnalist Yuliya Gorodetskaya haber etti.
Onıñ aytqanına köre. New Yorktaki kontsertni lâğu etmek muracaatınen kontsert teşkilâtçılarına mektüp yazğan faaller, Çikagodaki çıqış lâğu etildi, dep haber ettiler.
Qırım.Aqiqat muarririyetiniñ elinde mektüp metni bar. Onda, jazzmannıñ cedvelinde uyğunsızlıqlar bar olğanı içün kontsert lâğu etile, dep yazılğan.
Butmannıñ saytında kontsert aqqında haber daa bar, amma çıqışı olacaq The Promontory klubunıñ saytında ilân artıq yoq.
Rusiye jazzmanı İgor Butman ve onıñ vekilleri kontsetniñ lâğu etilmesini tefsir etmey.
New Yorkta yanvarniñ 30-ında faaller, 2014 senesi Qırımnıñ ilhaqına qol tutqan Rusiye jazzmanı İgor Butmannıñ kontsertine qarşı narazılıq kösterdi.
Daa evel Butmannıñ Bostonda bir qaç kontsertini lâğu ettiler. Arts Against Aggression teşkilâtınıñ faalleri, müessise reberligine çalğıcınıñ siyasiy noqta-i nazarı aqqında haber etkeni içün, onıñ soñki kontserti lâğu etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
