Martnıñ 16-ndan itibaren ve kelecek eki afta devamında Ukraina çetel vatandaşlarını ve vatandaşlıqsız şahıslarnı memleketke kirsetmeycek, dep bildire Azatlıq Radiosı Ukraina Tış işler nazirligi matbuat hızmetiniñ malümatına esaslanıp.
«Tedbirler martnıñ 16-nda saat 00:00-da (bazar künü, martnıñ 15-nden, bazarertesi, martnıñ 16-na, keçer gecesi) işke tüşürile ve eki afta aprelniñ 3-ne qadar devam etecek. Bu müddet bitkeninen mezkür tedbirler ya devam ettirilecek, ya da lâğu etilecek, er şey COVID-19 tarqaluvınen bağlıdır. Ukrainada yaşamaq (vaqtınca ya da daimiy) aqqı olğan çetel vatandaşları ve Ukraina Tış işler nazirliginiñ ayrı qararınen çetel diplomatik ve konsullıq hadimleri, halqara teşkilâtlarnıñ temsilcileri içün istisna yapılacaq», – dep aytıla Tış işler nazirliginiñ haberinde.
Tış işler nazirliginiñ konsullıq hızmeti departamentiniñ gece bildirgenine köre, çetel konsullıq müessiseleri vatandaşlarnı vaqtınca qabul etmey ve viza bermey, bu qarar martnıñ 14-nden berli çalışa. Ukraina Devlet sıñır hızmetiniñ malümatına köre, martnıñ 16-ndan başlap yüzge yaqın keçiş noqtası vaqtınca qapatıla, daa aman-aman elli keçiş noqtasında yayalar vaqtınca keçirilmey.
Vaqtınca qapatılğan keçiş noqtalarını mında baqmañız mümkün.
Martnıñ 11-nde Dünya sağlıq teşkilâtı koronavirus yuqunçı sebebinden pandemiyanı ilân etti. Martnıñ 12-nde Ukrainada koronavirus yuqunçınıñ qırğınlıq telükesi ve onıñ tarqaluvına yol bermemek içün karantin başlandı. O, üç afta – aprelniñ 3-ne qadar devam etecek.
Ukrainada al-azırda üç koronavirus hastası qayd etildi, bir qadın vefat etti.
