Noyabrniñ 16-nda Ukraina Tış işler naziriniñ birinci muavini Emine Ceppar din serbestligi halqara nazirler körüşüvinde Tış işler nazirlerininiñ ve çetel devletlerniñ temsilcileriniñ diqqatını Rusiye tarafından işğal etilgen Qırımdaki din azatlığı bozulmasına çekti ve “Qırım platforması” çerçivesinde bu mevzunıñ muzakeresinde iştirak etmege davet etti.
Bu aqta Ukraina TİN matbuat hızmeti haber ete.
“Yedi yıldan berli işğaciler türlü konfesiyalar temsilcilerini diskriminatsıyalarğa oğrata. Diniy toplulığını taqıp etüv ve zulumğa oğratuv Rusiye tarafından vaqtınca işğal etilgen Ukraina topraqlarında normağa çevilrldi”, – matbuat hızmeti Cepparnıñ aytqanından alıntı ketirdi.
Onıñ bildirgenine köre, din serbestligi meseleleri halqara koordinatsiya mehanizmi – “Qırım platforması”nıñ diqqat merkezinde olacaq.
Böyle nazirler körüşüvi endi üçünci kere olıp keçti. Onı ABD Devlet departamentiniñ destegi ile Poloniya Cumhuriyetiniñ TİN teşkil etti. Birinci körüşüv 2018 senesi Vaşingtonda keçirilgen edi.
Avropa Şurasında Ukrainanıñ daimiy temsilcisi Boris Tarasük, Rusiye qırımtatarlarnı basqılarğa oğratmağa ve Qırımdaki Ukraina Ortodok kilsesiniñ Qırım yeparhiyasını sıqıştırmağa devam ete, dep bildirdi.
Evel OSCE-de ABD elçisi Cems Gilmor, Rusiye işğal etilgen qırımda Rusiye ortodok kilsesinden ğayrı bütün diniy teşkilâtlarnı taqip ete, dep bildirdi.
Yarımadada "qanunsız missionerlik faaliyeti" sebebinden taqip etilgen imamlar Rusiye ile işbirligi yapqan Qırım musulmanları diniy idaresine boysunmay.
