Çernivtsi vilâyetiniñ bir sakinini koronavirus hastalığı şübesinen hastahanege qoydılar. Bunı Azatlıq Radiosı bildire.
Çernivtsi şeerinde çetelden qaytqan aqaynı infektsiya hastalığı alâmetlerinen hastahanege qoydılar, denile beyanatta.
Şimdi Çevnivtside martnıñ 7-sinde hastahanege qoyulğan başqa adamnıñ analiz neticelerini bekleyler. O adamnıñ da infektsiya hastalığı alâmetleri bar edi ve o da çetelden qayttı.
Bundan evel oşağan şubelernen hastahanege qoyulğan altı adamnıñ teşkerüv neticeleri koronavirus olmağanını kösterdi, hatırlata vilâyet memuriyeti.
Ukrainada yekâne tasdıqlanğan COVID-19 adisesi matrnıñ 3-ünde Çernivtside qayd etildi. Bildirüvlerge köre, İtaliyada hastalanğan adam şimdi stabil alda.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
