Çerniğiv vilâyetiniñ İçnâ şeeri yaqınlarında silâ anbarlarında olğan patlavlardan soñ bazı devlet yollarında areket qapatıldı, dep bildire oktâbrniñ 9-nda saba «Ukravtodor».
Qazadan sebep fevqulâde vaziyet alanı – 16 km.
Çerniğiv vilâyeti İçnâ şeeriniñ civarındaki anbarlarda patlavlar saat 03.30-larda başladı. Fevqulâde vaziyetler devlet hızmetiniñ malümatına köre, 04:22-de 30 kilometr radiusında ava boşluğı qapatıldı, demiryol ve maşina naqliyatınıñ areketi vaqtınca toqtatıldı. Tahminen 10 biñ insan tahliye etildi.
Patlav sebepleri ya da zarar körgenler aqqında bir de bir malümat şimdilik yoq.
Ukrainadaki silâ anbarlarında patlavlar ilk sefer olmay. Keçken sene mart ayında Harkiv vilâyetiniñ Balakleya civarlarındaki top silâ anbarlarında yanğın çıqtı ve silâ patlamağa başladı.
2017 senesi sentâbriniñ soñunda Vinnitsa vilâyetiniñ Kalınivka şeerindeki silâ anbarlarında yanğın ve patlavlar olğan edi.
