Çerniğiv vilâyetindeki silâ anbarlarında olğan patlavlar neticesinde telükeli alanda 30 meskün yer, yani aman-aman 20 biñ insan olması mümkün. Bu aqta Ukraina fevqulâde vaziyetler devlet hızmeti haber ete.
Saba saat 8:30-da anbarda yanğın ve patlavlar devam ete edi. Ukraina Silâlı quvetleriniñ Baş ştabı bildirdi ki, arbiyler ve adiy insanlar arasında zarar körgenler yoq. Maddiy zarar aqqında bir malümat şimdilik yoq.
Baş ştabnıñ malümatına köre, Çerniğiv vilâyetindeki silâ anbarlarında saba saat 7-de saniyede 2-3 patlav ola edi.
İçnâ ve civarındaki meskün yerlerden tahminen 10 biñ insan tahliye etildi.
«Ukravtodor» bildirdi ki, Çerniğiv vilâyetiniñ silâ anbarlarında olğan patlavlardan soñ bazı devlet yollarında areket qapatıldı. Ukraina fevqulâde vaziyetler devlet hızmetiniñ malümatına köre, 30 kilometr radiusında ava boşluğı qapatıldı, demiryol ve maşina naqliyatınıñ areketi vaqtınca toqtatıldı. Tahminen 10 biñ insan tahliye etildi.
Ukrainadaki silâ anbarlarında patlavlar ilk sefer olmay. Keçken sene mart ayında Harkiv vilâyetiniñ Balakleya civarlarındaki top silâ anbarlarında yanğın çıqtı ve silâ patlamağa başladı.
2017 senesi sentâbriniñ soñunda Vinnitsa vilâyetiniñ Kalınivka şeerindeki silâ anbarlarında yanğın ve patlavlar olğan edi.
