İlhaq etilgen Qırımnı «davalı topraq» olaraq qayd etip, oquv atlaslarını bastırğan çeh neşriyatı hatanı tüzetti. Yarımada Ukraina territoriyası olaraq qayd etildi. Bunı Ukrainanıñ Çeh Cumhuriyeti elçisi Yevgen Perebıynis sentâbrniñ 17-nde aydınlattı.
«Atlasnıñ oquvda qullanmasına qarşı kösterilgen elçihane narazılığı ve Çeh Cumhuriyeti Tasil nazirliginiñ tevsiyelerinden soñ Kartografie Praha çeh neşriyatı haritalarındaki hatalarnı tüzetti. Qırımnıñ kimge ait olmasınen bağlı şübe artıq yoq. Fotoresimde: eski ve yañı haritalar», – dep yazdı Ukraina elçisi Twitterde.
2018 senesi fevral ayınıñ başında Çehiya Tasil nazirligi Ukraina ve Gürcistannıñ şikâyetlerine emiyet berip, mekteplerde qullanılğan yañı dünya atlasınıñ ruhsetini keri aldı. Macaristannıñ paytahtı Budapeştteki tükânda da ilhaq etilgen Qırım yañlış kösterilgen coğrafik haritalar çekip alındı.
Bunıñ kibi vaziyetler diger memleketlerde de olğan edi. 2015 senesinden itibaren Ukraina Tış işler nazirligi «Dünya haritasında Qırım» leyhasını kerçekleştirip, haritalarda Qırımnıñ yañlış kösterilgenini körgenlerden bunı haber etmelerini rica ete. Bu leyha çerçivesinde Ukrainağa ait işğal etilgen Qırımnıñ Rusiye olaraq kösterilmesini toqtatmağa tırışalar. Birinci basamaqta basma ve elektron haritalar, 2017 senesi yazda başlağan ekinci basamaqta ise navigatsion sistemalar ve mal qayd etilmekte.
