Rusiye kontrolindeki İçki rayon mahkemesinde imaye tarafı «çaqmağanında» qabaatlanğan Enver Topçiniñ davası boyunca delillerni kösterip başladı. Dekabrniñ 23-nde olıp keçken oturışuvda umumiy psihologik-tilşınaslıq-dinşınaslıq ekspertizasını keçirgen ekspertler sorğuğa çekildi, dep haber ete Qırım.Aqiqat mühbiri.
«Bugün imayeniñ muracaatınen Enver Topçige qarşı cinaiy davağa keçken Dadaconovnıñ davası çerçivesinde keçirilgen umumiy psihologik-tilşınaslıq-dinşınaslıq ekspertizasını keçirgen üç ekspertten ekisini sorğuğa çektik. Ekspertler, AbuBakr İbn Ahmad adında saifeden yazğan insannen bağlı ekspertiza keçirdi, dep bildirdi. Dadaconov ve Topçi aqqında bir şey bilmeymiz, dep aytalar. Biz AbuBakr İbn Ahmad ve onıñ diger saifelernen yazışqanını aytamız. Ekspertler AbuBakr ibn Ahmadnıñ Topçi saifesinen yazışqanını ayrı baqmadı», – dep tarif etti advokat Emil Kurbedinov.
Onıñ aytqanına köre, yazğan hulâsalarında ekspertler AbuBakr ibn Ahmad Topçige «IŞİD topraqlarında buluna ve cenkçi ola» dep bildirgenini qayd etti. Advokat, böyle hulâsalarnıñ sebepleri aqqında sorasa, ekspertler yazışmada tapqanını aytqan malümatnı aydınlattı.
«Ekspertler yazışmada AbuBakr ibn Ahmadnıñ mesacını taptı: «Men Halifeliktem, Şamdam, mında Şamğa bizge aşıq». Bu mesac esasında ekspertler Dadaconov IŞİDde edi, dep hulâsa çıqara. Halifelik ve Şam IŞİDni ifade etkenini bilmek içün ayrı bilgiler kerekmi degen sualime ekspertler bu tarihiy adlar, amma zemaneviy kerçeklikte Halifelik ve Şam ekstremist adlar ve ekstremist manalarını taşıy, dep ayttı», – dep tarif etti advokat.
Keçken afta Qırımnıñ İçki rayon mahkemesi bu dava boyunca qabaatlav şaatlarınıñ sorğusını yekünledi.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
