Ukrainada noyabrniñ 24-nde «Çıraq yaq» aktsiyası keçirilecek. Kyiv saatine köre saat 16:00-da ukrain halqınıñ Ğolodomor-genotsidiniñ qurbanları sükünet daqqası ile añılacaq, dep bildire Radio Svoboda.
Elâk olğan ukrainalılarnı añmağa istegenler pencere pervazında çıraq yaqa bile, dep hatırlata Ukraina milliy hatıra institutı.
İnformatsion kampaniyasında #Golodomor85, #Holodomor85 heştegleri ve «Unutmadıq! Küçlümiz!», «Ukraina unutmadı! Dünya bile» şiarları qullanıla.
Sentâbrniñ 1-nde Kyivde 85 kün devamında dünyanıñ 85 köşesinde keçirilgen «Hatıra çırağını yaq» halqara aktsiyası başlağan edi.
Aktsiyanıñ teşebbüsçisi Dünya ukrainalılar kongressi ola, Ukraina Tış işler nazirligi, Ukraina milliy hatıra institutı ve «Ğolodomor qurbanlarınıñ abidesi» milliy müzeyi oña qoltuttı.
Ukraina milliy hatıra institutı noyabrniñ 24-ne elâk olğanlarnı sayğı ile añmağa çağırğan levhanı aydınlattı.
Video Young & Hungry Production tarafından Ukraina haber siyaseti nazirliginiñ yardımınen, Ukraina Silâlı quvetleri Baş ştabı ve Qurtulış areketiniñ tedqiqat merkeziniñ iştiraki ile çıqarıldı.
