«Hayyat Tahrir aş-Şam davasınıñ» mabüsi İzet Ablâmitov onı şuursız tanığan psihiatrik ekspertiza neticelerine baqmadan, Aqmescit tahqiqat izolâtorında tutula. Bu aqta advokat Konstantin Rustemov Qırım.Aqiqat mühbirine bildirdi.
«Müvekkilimniñ davasında onı şuursız tanığan psihiatrik ekspertiza qararı bar. Onı avgustnıñ 3-nde çıqarılğan SİZOdan mahsus hastahanege avuştıruv qararı bar. Amma bir sebepten alâ daa SİZOda qala. Avgustnıñ 16-nda Qırım prokuraturasına ariza berdim, lâkin andan bir cevap yoq. Tünevin SİZOğa bardım, ve tünevin daa anda edi», – dep bildirdi advokat.
2021 senesi aprelniñ 8-nde Rusiye FSBsi Aqmescitniñ tasil müessisesinde terakt azırlağanında qabaatlanğan 1992 ve 1999 senesi doğma eki vatandaş tutuldı, dep haber etti.
Soñra «terrorizmge yardım etüv» şübhesinen FSB tarafından tutulğan eki sakinlerden biri eki ayğa apiske alındı.
«Hayyat Tahrir aş-Şam» 2017 senesi yanvar ayında quruldı ve «Cebhat an-Nusrı» tarafından idare etile. Teşkilât erkânında Suriyeniñ İdlib şeerinde terror faaliyetini kerçekleştirgen tahminen 20 biñ isyancı bar.
2020 senesi Rusiye Yuqarı mahkemesi Rusiye baş prokurorı İgor Krasnovnıñ davasını qanaatlendirip, «Hayyat Tahrir aş-Şamnı» terror teşkilâtı olaraq tanıdı.