Qırımtatar Milliy Meclisiniñ reisi Refat Çubarov PACEniñ sanktsiyalarnı kirsetüv, hususan Rusiyege qarşı, tertibini qıyınlaştıruv qararı sebebinden Mustaqillik Meydanında umummilliy toplaşuv keçirmege çağıra.
«Ukraina siyasiy milletiniñ Rusiye istilâsına tirenüv ve Ukraina topraq bütünligininiñ Qırım ile ğayrıdan tiklenüvi meselesinde qararlı olğanını bütün dünyağa köstermek kerek. Böylece, vatandaş cemiyeti iç zıddiyet ve qavğalarnı çette qaldırıp, yaqın künlerde, belki, iyünniñ 28-nde – Ukraina Anayasası kününde – millionlarnen vatandaşnı Mustaqillik Meydanında umummilliy toplaşuvğa çağıra bile», – dep yazdı Çubarov Facebookta.
Onıñ aytqanına köre, bugün «Ukrainağa hainlik yapqan, Qırım ve sakinlerini Rusiyege parçalamağa bergenler azimkârlığımız ve sarsızlağımıznı körmeli».
Avropa Şurası Parlament assambleyası iyünniñ 25-ne keçer gecesi keçirilgen toplaşuvında PACE qaidelerini deñiştirgen ve sanktsiyalarnı qullanuv tertibini, hususan Rusiyege qarşı, qıyınlaştırğan qararğa qoltuttı. Buña 118 PACE azası rey berdi, 62-si qarşı çıqtı, 10-u bitaraf qaldı.
Rusiye eyyeti Assambleya sessiyalarında 2015 senesi yanvar ayından itibaren, eyyetniñ vekâletleri ciddiy şekilde sıñırlanğan soñ, iştirak etmey.
Ukraina aq qorçalayıcılarınıñ fikirince, Rusiye eyyeti Avropa Şurası Parlament assambleyasına qaytsa, Rusiyeniñ teşkilât talaplarına riayet etmegen taqdirde bu devletlerara teşkilâtnıñ «ahlâqiy teslimiyeti» olacaq. Bu aqta aq qorçalayıcı teşkilâtlarınıñ PACE tertip, immunitet ve qurulış işleri komitetine, Avropa Şurası iştirakçi memleketleriniñ milliy eyyetlerine yapqan açıq muracaatında aytıla.
Muracaatqa 12 ukrain aq qorçalayıcı teşkilâtı, şu cümleden «Vatandaş serbestligi merkezi», «Kreml siyasiy mabüsleri soy-soplarınıñ birleşmesi», «KrımSOS», «Qırım aq qorçalayıcı gruppası», «İnsan aqları media teşebbüsi» qoltuttı.