21 qadın ve 54 bala – Ukraina vatandaşları – Suriyede «bozulğan infrastruktura topraqlarında» zor şaraitlerde bulunıp, Ukrainağa qaytmaları içün yardım etmemizni rica ete, dep bildirdi Qırımtatar Milliy Meclisiniñ reisi, Petro Poroşenko Bloku halq deputatı Refat Çubarov.
«Soñki vaqıtları Qırımtatar Milliy Meclisine ve maña, Ukraina halq deputatına olaraq, Ukraina vatandaşları olğan farqlı milletlerden qadınlar muracaat etip başladı – olar çeşit sebeplerden küçük balalarınen beraber Suriyede bulunıp, olarğa Ukrainağa qaytmağa yardım etmemizni rica ete», – dep yazdı Çubarov Facebookta martnıñ 24-nde aqşam.
Onıñ aytqanına köre, Milliy Meclis bu mevzuda Ukraina Tış işler nazirliginen iş tuta.
Martnıñ 23-nde ABD, Frenkistan ve Britaniya qoltutqan Suriyedeki isyancı müfrezeleri, «Suriye demokratik quvetleri», memleketniñ ekstremistler tutqan soñki meskün yeri olğan Baguz köyüni «İslâm devleti» ekstremist birleşmesinden tamamen boşaltqanını ilân etti.
Baguznıñ aluvı ekstremistler ilân etken «halifelikniñ» soñunı ifadelemekte. O, kenişlegende Suriye ve Iraqnıñ büyük topraqlarını alğan edi.
«İslâm devleti» «halifelikni» ilân etkende biñlernen çetel vatandaşı Iraq ve Suriyege yaşamağa ketti.
Suriyede 2011 senesinden berli vatandaş cenki devam ete. Onıñ neticesinde tahminen 400 biñ insan elâk oldı.