Qırım musulmanları davası boyunca Rusiye mahkemesi tarafından mahküm etilgen, mustaqil musulman cemiyetiniñ sabıq reisi Lenur Halilovnıñ alı ağır. O, aman-aman areket etip olamay, tayin etilgen tedaviylev hastalıq inkişafını toqtatmay, dep bildirdi Qırımtatar jurnalisti ve aq qorçalayıcısı Lutfiye Zudiyeva.
"O, solup kete. Bugün Lenur Halilov öz başına areket etip olamay: onı köpçekli teskerenen alıp keteler, yürse bile, tek başqa insanlarnıñ yardımı ile ya da etraftaki şeylerge tayanıp areket ete. Eki aydan ziyade evel Lenur Halilovnı koloniyadan Aqyar vilâyetindeki FSİN-niñ vilâyet hastahanesine avuştırğan ediler, amma tayin etilgen terapiya bir netice bermey. O, hastalıq inkişafını toqtatmay ve ağrını bile yımşatmay", — dep bildirdi Zudiyeva Facebook saifesinde.
Zudiyevanıñ aytqanına köre, o sağlıq vaziyeti sebebinden azatlıqqa çıqmağa tırışa, amma şimdilik bir müsbet netice yoq.
Çeçekniñ ortasında Halilovnıñ qadını Umida Hudoyberdiyeva "Devlet hızmetleri" rus devlet shızmetinden haber aldı. Mında aytıla ki, bu sene Çeçekniñ 1-de Rusiye Sağlıq nazirligi Lenur Halilovğa III-ünci gruppa saqatlığını berdi. Onıñ aytqanına köre, Qırımlı alâ daa kerekli ilâclarnı almay.
Lenur Halilov — Aluşta mustaqil musulman cemiyetiniñ sabıq yolbaşçısıdır.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.