Qırımda başı örtüli qırımtatar qadınlarına kene ücüm etilgeni qayd etile. Musulman qaidelerine köre başını qapatqan eki qırımtatar qadınına qarşı yañı areketler aqqında belli oldı, dep bildirdi aq qorçalayıcı, jurnalist ve qırımtatarı Lutfiye Zudiyeva.
Onıñ bildirgenine köre, şaatlarnıñ aytqanına köre, iyulniñ 31-nde Bağçasaraydaki mesken evlerden biri yanında yerli sakin bala meydançığında üç kiçik balasınen olğan qadınğa ücüm etti. Şaatlar ücüm etken qadın küfür sözlerini qullandı, qırımtatatarlarnı qabaatladı ve olarnı "yoq etecegini" ayttı.
Polis çağırılğan soñ qadın başta ketti, amma soñra pıçaqnen qayttı ve zarar körgen qadınğa yardım etmege başqa qadınnı qorquzıp başladı. Balalı ana meydançıqtan ketmege mecbur oldı.
Zudiyevanıñ aytqanına köre, zarar körgen qadın Rusiye uquq qoruyıcı organlarına ariza berdi. Amma, onıñ aytqanına köre, bugünki künde tahqiqatnen bağlı yeterli areket körmey. Olğan maalümatqa köre, adiseni kiçik yaramazlıq olaraq tasnif eteler – qorquzuvlar, pıçaq qullanıluvı ve milliy nefret alâmetlerini köstergen laflarğa qulaq asılmadı.
Aq qorçalayıcı iyünniñ soñunda Qırımnıñ Yedi Quyu rayonında da bir qırımtatar qadını buña oşağan adisege oğrağan edi, dep qoştı. Zarar körgen qadınnıñ aytqanına köre, bir qasabanıñ sakinleri arasındaki zıddiyet vaqtında qomşuları – bir çift – baş örtüsini çıqarmağa tırıştı. Mahkeme olarnı kiçik yaramazlıq maddesine istinaden memuriy mesüliyetke çekti. Qadınnıñ aytqanına köre, bu adiseden soñ vaziyet deñişmedi, basqı ise arttı.
Lutfiye Zudiyeva qayd ete ki: buña oşağan er adise resmiy şekilde qayd etilmeli ve milliy ya da diniy nefret sebebi olsa, uquq ceetinden qıymet kesilmeli.
"İnsanlarnı çatıştırmaq ıntıluvlarına vaqtında ve tarafsız qıymet kesilmeli. İlk işaretlerine emiyet bermemek telükeli: dünyanıñ çeşit regionlarınıñ ikâyeleri cemiyet içün ciddiy aqibetleri ola bilecegini köstere. Bizim vazifemiz – kerginleşmesine yol bermemek", – dep qayd etti Zudiyeva.
Rusiye ve Rusiye kontrolindeki Qırım kütleviy haber vastaları ve Qırımnıñ İç işler nazirligi, prokuratura, Qırım yolbaşçısı ve diger akimiyet organlarınıñ resmiy resursları bir beyanat, izaat, inkâr ya da tasdıqlav bermedi.