"Skazka" ayvanat bağçasınıñ ve "Taygan" parkınıñ saibi Oleg Zebkov, noyabrniñ 29-ında ayuvlar ve onıñ parklarınıñ başqa ayvanlarınıñ taqdirinen meraqlanğan bütün adamlar içün matbuat konferentsiyasını toplay.
Bunıñ aqqında malümat onıñ blogında yerleştirilgen edi.
"Oleg Zubkov, qırımlılarnı raatsızlağan suallerge şahsen cevap berecek", - denile beyanatta.
Kreml nezaretindeki Yalta mahkemesi, noyabr 21-inde ayvanlarnıñ tutıp alınması aqqında Oleg Zubkovğa qarşı davanı baqıp başladı.
Qırımda, Kyivde, New Yorkta Zubkovnıñ parklarına qoltutqan bir kişilik piketler keçirildi.
Noyabr 14-ünde Zubkov, mahkeme parknıñ işini toqtatsa, 30 ayuvnı öldürmege mecbur olacaq, dep bildirdi.
2014 senesinde işğalge qol tutqan Qırım iş adamı Oleg Zubkovnıñ yarımada akimiyetinen uzanğan davası bar. Zubkov, beş yıl devamında mülkiyeti olğan topraqnı resmiyleştirip olamağanını ayta.
Qırım ilhaqı yılları içinde Zubkov, para cezası ve qabaatlavlarnen bağlı 500-den ziyade mahkeme oturışına bardı.