"Zla Mavka"qadın tirenüv areketiniñ faalleri öz telegram kanalında, Aluştada ve Aqmescitte tarqatılğanı iddia etilgen Ukrayina destegine beyannamelerniñ fotoresimlerini derc etti.
"Aluşta ve Aqmescit soqaqları uyanmaqta. Ve olarnen beraber qadınlarnıñ tirenüvi de Ukrayina kibi serbest, küçlü ve boysunmaz, devam ete", — dep faaller fotoresimlerni imzaladılar.
Bundan evel areketniñ telegram kanalında Rusiye bayrağınıñ yaqılğanı aqqında video derc etilgen edi. Video ile paylaşılğan haberde bayraq Aqyar plâjında yaqılğanı iddia etile.
Soñki vaqıtları Rusiye tarafından işğal etilgen Qırım ve Ukrayinanıñ cenübinde işğal etilgen topraqlardaki qarşılıq areketleri arasında "Zla Mavka" qadınlar areketiniñ iştirakçileri pek faal. Qızlar ukrayin timsalleri ile beyannamelerni tarqata ve diger çoq sayılı qarşılıq aktsiyalarını keçire. Olarnıñ esas maqsadı işğal altında yaşağan semetdeşlerine qol tutmaq.