Ukrayina prezidenti Volodımır Zelenskıy Vaşingtonda NATO sammitinde imzalanğan "Ukrayina añlaşması"na "müim bir irişme" dedi.
"Bizim imzalağanımız "Ukrayina añlaşması" munasebetlerimizni yañı seviyege kötere — Ukrayina ve epimiz içün müim bir muvafaqiyet", — dep bildirdi o.
Zelenskıy hatırlattı ki, keçken sene Vilnüste NATO sammitiniñ iştirakçileri Ukrayina içün telükesizlik boyunca G7 beyannamesinen "pek küçlü bir adım" yaptılar.
"Men prezident Baydenge liderligi ve telükesizlik saasında işbirligimizniñ ciddiy areketlernen tolu olması içün yapqan ğayretleri içün teşekkürler bildirem. 23 küçlü añlaşma bar, ve diger memleketlernen añlaşmalar olacaq. Ve bizde Amerika Birleşken Devletleri ile tarihiy emiyetli telükesizlik añlaşması bar", — dep ayttı o, ve şunı qayd etti ki, bunıñ episi Ukrayinağa kerekli ava mudafaasını elde etmege yardım etti.
Vaşingtonda NATO aza memleketleriniñ 24 lideri Ukrayinanıñ uzun müddetli telükesizligi boyunca mecburiyetleriniñ bir qısmı olğan "Ukrayina añlaşmasını" tasdıqladı. Hususan, imzalağanlar "tez ve kollektiv" olaraq eñ yüksek seviyede toplaşıp, şimdiki cenk areketleri bitken soñ, Ukrayinağa qarşı ola bilecek ücümde qol tutuv adımlarını belgilemekni avale ettiler.
İyül 9-11 künleri Vaşingtonda olıp keçken sammitniñ iştirakçileri öz beyannamesinde Ukrayinanıñ "tam avroatlantik integratsiyasına doğru" "areket etkenini" qayd ettiler.
Ukrayina, maqsadı NATO azası olmaq olğanını açıq-aydın bildirdi. Kıyiv ve onıñ NATO-daki bazı ittifaqdaşları, hususan Şarqiy Avropada, Ukrayina cenk vaziyetinde bulunıp, NATO-ğa kiremez, dep tanısalar da, aza olmağa davet etüvde israr eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.