Ukrayina prezidenti Volodımır Zelenskıy Kyodo News neşrine bergen intervyüsında bildirdi ki, al-azırda Qırımnıñ arbiy yolnen işğalden boşatıluvı "quvetler yetmegeni içün imkânsız", Ukrayina mevamı quvetleşken taqdirde "diplomatik yollarnı qıdırmaq" kerek.
"Ukrayinanıñ küçlü bir pozitsiyada bulunmasını ve diplomatik çezüvge başlamasını temin etmeli. Qırımnı qaytarmaq içün küçümiz yetmey. Ebet, diplomatik yollarnı tapmaq kerek, amma tek Rusiye istilâsınen qaytmaycağını bilgenimizden soñ", — dedi Zelenskıy.
Zelenskıy şunı da qayd etti ki, Ukrayina erte ya da keç Rusiye tarafından zapt etilgen bütün topraqlarını, şu cümleden Qırımnı da, qaytaracaq.
"Putin bütün topraqlarımızğa qaytacağımıznı bilmeli. Ve diplomatik yolnen qaytmaq daa yahşıdır, çünki bu qurbanlarnı eksilte. Amma Qırım tek bizler içün degil de, bütün dünya içün strategiktir. Qırımnı nezaret etken — Qara deñizdeki telükesizlikni nezaret ete", — dep qoştı Zelenskıy.
Noyabrniñ soñunda Fox News telekanalına bergen intervyüsında Zelenskıy, Ukrayina Qırımnı işğalden qurtarmaq içün on biñlernen insannı ğayıp etip olamay, onı diplomatik yollarnen qaytarmaq mümkün, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.