Kıyivde Rusiye ücümleri neticesinde üç zarar körgen yerde qaza-qurtaruv işleri devam ete, dep bildirdi Ukrayina prezidenti Volodımır Zelenskıy.
Qurtarıcılar viranelerniñ büyük qısmını temizlediler, amma daa 10 insan alâ daa alâqada degil. Qıdıruv tedbiri keregi qadar devam etecek, dep bildirdi o.
Bundan ğayrı, tünevin rusiye ordusı Krıvıy Riğ şeerindeki garaj kooperativine ücüm etti, dep qayd etti Ukrayina devletiniñ yolbaşçısı — anda yedi insan zarar kördi. Harkiv vilâyetinde şahsiy evge ücüm etilgeninde altı insan zarar kördi, olardan üçü bala.
Herson vilâyetiniñ hastahanesinde de bir ekim elâk oldı, Sumı vilâyetinde dört insan elâk oldı, şu cümleden ana ve kiçik qızı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.