Zelenskıy Keriç köprüne endirilgen ücümlerni izaatladı ve SBU ve Ukrayina Silâlı quvetleri Baş ştabınıñ ameliyatları aqqında tarif etti

Volodımır Zelenskıy

Ukrayina prezidenti Volodımır Zelenskıy, Boş aynıñ 16 ve 17 künleri Keriç (Qırım) köprüne yapılğan ücümlerni izaatlap, Ukrayina Telükesizlik hızmeti ve Ukrayina Silâlı quvetleri Baş ştabınıñ bir qaç afta devamında azırlağan çoq basamaqlı ameliyatı aqqında tarif etti. Bu aqta o, Telegram-kanalında bildirdi.

"Bugün er kes Rusiye territoriyasından bizim Ukrayin Qırımımızğa alıp ketken esas arbiy keçiti içün aqibetlerini köre bile. Bu, bir qaç afta devam etken ve Telükesizlik Hızmeti tarafından Ukrayina Silâlı quvetleriniñ Baş ştabı ile beraberlikte azırlanğan ve idare etilgen yedinci ameliyatnıñ neticesidir", — dep bildirdi Zelenskıy.

Ukrayina prezidentiniñ aytqanına köre, ameliyat devamında Ukrayin arbiyleri Rusiyeniñ ava mudafaası sistemalarına, radiolokasiya stantsiyalarına, radioelektron küreş vastalarına ve Keriç köprüniñ qoruvını temin etken diger obyektlerge ücüm etken.

"Bugün esas basamaqta, köpürniñ avtomobil qısmını urğan "Palânıtsâ" uçaqları, ve demiryol qısmını urğan "Neptun" raketaları, "Ruta" ve FP-5 dronları özüni yüksek seviyede kösterdiler. "Flamingo" yardımınen arbiylerimiz kontrol etilgen yıqıluvnı kerçekleştirdi ve bağ soñki saniyege qadar yahşı çalıştı", — dep qayd etti Ukrayina prezidenti.

O, SBU hadimlerine, Mudafaa Quvetlerine, Mudafaa Nazirliginiñ yolbaşçılığına, Ukrayina Silâlı Quvetleriniñ Baş Ştabına, Ukrayin silâ istisalcılarına teşekkür bildirdi.

Zelenskıynıñ aytqanına köre, bu ücümler Rusiyeniñ Ukrayina infrastrukturasına, şu cümleden Kıyiv, Dnipro, Zaporijjâ ve Odesa vilâyetindeki köpürlerge yapqan ücümlerine cevaptır.