ABD lideri Donald Tramp Ukrayina prezidenti Volodımır Zelenskıy ile telefon subeti vaqtında cenkniñ tez vaqıtta toqtatılmasına irişmek istegenini bildirdi, dep yaza Axios Ukrayin memurı ve eki diger menbağa atıf etip.
Neşirniñ subetdeşlerinden biriniñ aytqanı kibi, Zelenskıy, cenk bu sene bitecegine ümüt etkenini bildirgen. Tramp, cenk çoq vaqıt devam ete, dep cevap bergen. ABD prezidenti cenkniñ bir ay içinde bitmesini ister edi, dep añlattı menba.
Subet kiçik aynıñ 25-nde aqşam olıp keçti ve tahminen 30 daqqa devam etti. Axios malümatına köre, subet pek dostane ve müsbet keçken. Ukrayina memurı ve daa bir menba bildirgenine köre, Zelenskıy Trampqa yardım etkeni içün teşekkürler bildirip, yalıñız Tramp Kremlni cenkni toqtatmağa mecbur ete bile, dep aytqan.
Ukrayina memurınıñ aytqanına köre, Amerika prezidenti Rusiye ile barışıq añlaşmasınıñ çerçivesinde Ukrayinağa ABD tarafından telükesizlik kefaletlerini bermege azır olğanını tasdıqlağan.
Zelenskıy, Trump ile subet neticesinde yazğanına köre, Ukrayinada barışıq muzakereleri çerçivesinde üç taraflı körüşüv saban ayınıñ başında olacaq.
Ukrayina ve Amerika delegatsiyaları arasında eki taraflama muzakereler kiçik aynıñ 26-nda Jenevada keçirilmesi planlaştırıla.
"Körüşüv, liderler seviyesinde muzakereler keçirmege imkân berecek, dep ümüt etemiz. Prezident Tramp böyle adımlarnıñ ardı-sıra keçirilmesini destekley. Tek böyle etip bütün qıyın ve hassas meselelerni çezmek ve niayet cenkni toqtatmaq mümkün", — dep yazdı Zelenskıy.