Ukrayina 20 maddelik barışıq añlaşmasını parlament tasdıqlamasına çıqaracaq ya da bütün Ukrayina referendumını ötkerecek, dep bildirdi Ukrayina prezidenti Volodımır Zelenskıy.
"Ukrayina bu añlaşmanı parlament tasdıqlamasına çıqaracaq ve/ya da "ebet" ya da "yoq" şeklinde cevaplarınen bütün Ukrayina referendumını keçirecek", – dedi Zelenskıy jurnalistlernen körüşip.
O, em referendum, em prezident saylavları aynı vaqıtta keçirile bile, dep ayttı.
Bundan ğayrı, telükesizlik kefaletleri tek añlaşma bütünley tasdıqlansa ya da referendum tarafından qoltutulsa işke tüşürilecek.
Rusiye ve Ukrayina arasında cenkni barışıq yolunen toqtatmağa teşebbüs köstergen ABD prezidenti Donald Trump bu ay Politico neşirine intervyü berip, Ukrayina "çoqtan olmağan" prezident saylavlarını keçirmeli, dep bildirdi. Onıñ fikirince, Ukrayina akimiyeti "saylav olmasın dep cenkni qullana".
Bundan soñ prezident Volodımır Zelenskıy saylavlarğa azır olğanını bildirip, ABDni olarnı keçirmek içün telükesizlikni temin etmege yardım etmesine çağırdı.
Rusiye prezidenti Vladimir Putin ve diger Rusiye memurları Ukrayina prezidenti Volodımır Zelenskıy qanuniy degil, çünki 2024 senesi Ukrayinada prezident saylavları olmadı, Ukrayina vatandaş akimiyet organları ise regional memurlarnı prezident tayin etkeni içün qanunsız ola, dep aytqan ediler.
Dekabrniñ 19-nda Moskvadaki matbuat konferentsiyasında Putin Rusiye Ukrayinada saylavlar keçirilse, telükesizlikni temin ete bilecekmi "tüşünmege azır", dep bildirdi, hususan rey berüv kününde memleket içine darbelerden vazgeçüvini. Onıñ qayd etkenine köre, Ukrayinada saylavlar içün ateşni toqtatmaq şart degil, çünki Rusiye cenk vaqtında barışıq olmasa da, qaç kerek saylav keçirgen eken.
Ukrayinada 2022 senesi fevralniñ 24-nde ilân etilgen cenk vaziyeti vaqtında saylavlarnıñ keçirilüvi yasaqlana.