Ukrayına telükesizlik hızmetiniñ dronları 30-dan çoq Rusiye cermay zavodı, terminalı ve bazasına ücüm etti, dep bildirdi Ukrayına prezidenti Volodımır Zelenskıy iyünniñ 24-nde Ukrayına telükesizlik hızmeti «A» mahsus operatsiyalar merkeziniñ arbiylerine mukâfat berüv merasiminde.
Onıñ qayd etkenine köre, Ukrayına telükesizlik hızmeti «A» mahsus operatsiyalar merkeziniñ arbiyleriniñ iş neticeleri arasında – «cenkke çalışqan Rusiye iqtisadiy imkânlarını yoq etüv».
«Ukrayına telükesizlik hızmetiniñ dronları içün bir buçuq biñ kilometrlik mesafe de artıq problem degil. Ukrayına Silâlı quvetleri ve istihbaratımıznıñ muvafaqiyetlerinen beraber bu neticeler pek yahşı, olar Ukrayına içün bu cenkniñ adaletli bir şekilde bitmesini yaqınlaştıra, Rusiyege Ukrayın ve insanlarımızğa qarşı yapqanları içün kerçek, is etilgen, acı bir mesüliyet temin ete», – dep bildire Zelenskıynıñ aytqanlarını onıñ matbuat hızmeti.
2024 senesiniñ başından Rusiyede dronlarnıñ darbesine cermay sektorınıñ bir qaç müessisesi oğradı, şu sebepten bazı cermay işletken zavodda cermaynıñ ilk işletüv donatmaları çalışmay. Reuters malümatına köre, birinci üç ayda eñ az yedi Rusiye zavodı küçüni toqtattı. Ücümler sebebinden Rusiye Beyazrusiyeden daa çoq benzin alıp başladı, Qazahistandan da teslimat yapılmasını rica etti. Ukrayına prezidentit Volodımır Zelenskıy cermay işletken zavodlarğa qarşı ücümleri Rusiye ordusınıñ Ukrayına energetikasına qarşı ücümlerge cevap olaraq adlandırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.