Ukrayina prezidenti Volodımır Zelenskıy Ukrayina bugünde-bugün yılda 10 mln dron yapa, dep bildirdi.
"Devletniñ planını açıq-açıq aytqan ilk seferimni hatırlayım: yılda bir million dron. Er yerde işançsızlıq bar edi – em içeride, em tışarıda. Şimdi ise ayta bilemiz ki: bir yılda 10 million dron yapamız. 10, ve 20 olacaq", – dedi o, Kyivde Ukrayinan Devletçiliginiñ Künü munasebetinen keçirilgen merasimlerde.
Zelenskıy Ukrayina ilk sefer öz ballistik raketasını işlep çıqara, dep ayttı.
"Avropanıñ ballistikanen küreş imkânlarını birleştirip, Avropanıñ ballistikağa qarşı sistemasını qurmaq içün elimizden kelgenini yapacaqmız. Halqlarımıznıñ kökü qorçalansın, diktatorlar serbest insanlarğa Avropada nasıl yaşacaqlarını aytmasın dep. Ukrayinada ve er bir Avropa devletinde insanlarnıñ ayatı Putin ya da oña oşağanlarnıñ ballistikası barmı-yoqmı baqılmasın dep", – dep qoştı o.
Onıñ aytqanına köre, Ukrayinanıñ esas maqsadı – "benzinsiz Rusiye degil, Rusiyesiz Ukrayinadır".
"Ukrayina Avropanen beraber. Ve Ukrayina ve Avropa Moskva telükelersiz", – dedi prezident ve "umumiy telükesizlik içün elinden kelgenini yapqan er bir liderge" teşekkürler bildirdi.
İyulniñ 13-nde Zelenskıy Frenkistanda Ukrayinanıñ ballistikağa qarşı programmasını taqdim etti. Onıñ aytqanına köre, Ukrayinanıñ ballistikağa qarşı sistemasını tez yapmaq içün Ukrayinada daa olmağan şeyler olğan Avropa ortaqları kerek. Laf ballistikağa qarşı sistemanı qurmağa yardım ete bilgen sekiz memleket aqqında kete.
Freya Ukrayinanıñ ballistikağa qarşı sistemasınıñ leyhası bıltır mayısta belli oldı. Laf ballistik raketlarnı tuta bilecek ava mudafaası sisteması aqqında kete. Talilciler azır batareyanı açmağa imkân olğanına qadar aylar keçer, dep tenbiley.