Rusiyeniñ kütleviy ücümi "vatandaş infrastrukturasına mümkün olğanı qadar küçlü zarar ketirmek içün" çeşit ballistika, qanatlı raketa ve dronlardan ibaret edi, dep bildirdi Ukrayina prezidenti Volodımır Zelenskıy avgustnıñ 20-nde.
O, Kyiv ve vilâyetinde umumen 13 insan elâk oldı, daa tahminen 40 kişi yaralandı, dep qayd etti.
"Odesa vilâyetinde duşman Moldova sıñırındaki keçiş noqtasına, Çerniğiv vilâyetinde gaz infrastrukturasına ücüm etti. Birinci daqqalardan insanlarğa yardım etken bütün qurtarıcı, ekim, polis ve kommunal hızmet hadimlerine minnetdarım", – dep izaatladı Zelenskıy.
Devlet yolbaşçısı Moskva "ballistika ve kerginleşüvge para bergen vaqıtta" dünyanıñ böyle darbelerge cevabı aynı degil, dep qayd etti. Onıñ fikirince, Ukrayinanıñ ballistikağa qarşı çıqmaq içün yeterli vastası olmasa, Rusiye barışıq istemeycek:
"Biz imaye olsun dep elimizden kelgenini yapamız, ve er kün FREYJA programması üzerinde çalışamız. Amma "patriot" tutucılarınıñ yerini bir şey olamaz, ve olar er kün keyerek. Er bir raketa insanlarımıznıñ ayatını qurtara. Bunı añlağan, yardım imkânlarını qıdırğan ve tapqan er keske teşekkür bildirem".
Yerli akimiyetniñ malümatına köre, Rusiye darbeleri neticesinde Kyiv vilâyetiniñ bir sakini ve paytahtta eñ az 12 kişi elâk oldı.
Ukrayina Silâlı quvetleriniñ Ava küçleri bildirgenine köre, gece Rusiye ordusı ballistik raketalar, 44 diger çeşit raketa ve 168 uçucısıznı qullandı. Ava mudafaasınıñ quvetleri 39 qanatlı raketa, eki "Banderol" ve 145 uçucısıznı urdı.