Rusiye ilhaq etken Qırımnı qaytaruv meselesi cenkni toqtatuv barışıq ğayretleri çerçivesinde şimdilik muzakere etilmey, dep ayttı Ukrayina prezidenti Volodımır Zelenskıy ABD ziyareti vaqtında Fox News intervyüsında.
Alıp barıcınıñ Qırım meselesi kün tertibine qayttımı sualine böyle cevap berdi: "Ne yazıq ki, yoq. Ya da şimdilik yoq. Bilmeyim".
"Aramızda eñ müim şey – bu topraq, o – pek müim. Bu bizim toprağımız. Bu bizim tarihımız. Evlerimiz aqqında aytıla. Amma eñ esası – insanlarnı coymamaq", – dep qayd etti Zelenskıy.
Ziyaret vaqtında Ukrayina prezidenti ABD prezidentinen körüşti. Zelenskıynıñ aytqanına köre, Trumpnen Petriot içün litsenziyanı ve yardım etecek diger ğayelerni, diplomatik esnasnı faalleştirmek müim olğanını muzakere ettiler. Körüşüv matbuat içün qapalı edi. Zelenskıy Beyaz sarayda bir saattan ziyade bulundı.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayinanıñ sabıq Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.