Ukrayina prezidenti Volodımır Zelenskıy sentâbrniñ 22-nde aqşam New Yorkqa keldi. Salı künü ABD prezidenti Donald Trump ileye körüşecektir. Eki lider BM Baş assambleyasınıñ sessiyasında iştirak ete.
Zelenskıy bunıñ ögüne bir qaç körüşüv keçirdi, hususan Qazahistan prezidenti Kasım-Jomart Tokayev, Konstantinopol patriarhı Varfolomey, ABD prezidentiniñ Ukrayina mahsus vekili Keith Kellogg ile körüşti. Kellogg ile körüşüvde, Zelenskıynıñ aytqanına köre, Ukrayinağa Amerika silâsınıñ berilüvi ve cebedeki vaziyet muzakere etildi. Zelenskıy Tokayevge Ukrayina suvereniteti ve topraq bütünligine qoltutqanları içün teşekkürler bildirdi – Qazahistan Rusiye ile yahşı munasebetlerini saqlap, Qırım ve diger topraqlarnıñ ilhaqını tanımay.
Sentâbrniñ 23-nde Ukrayina prezidenti BM Baş assambleyasınıñ sessiyasında çıqışta bulunacaq.
Zelenskıy ve Trump bir ay evelsi körüşken ediler, Ukrayina prezidenti Avropa liderlerinen Beyaz saraynı ziyaret etken edi. Trump cenkni bitirmek maqsadınen Rusiye ve Ukrayina prezidentleriniñ körüşüvine azırlıq kete, ABD prezidenti de iştirak ete bile, dep bildirgen edi. O vaqıttan berli böyle bir körüşüv teşkil etilmedi, çünki Rusiye razı olmadı. Cenk devam ete, Rusiye Ukrayinağa qarşı darbelerni arttırdı. ABD prezidenti Vladimir Putinniñ areketlerini begenmey ve Rusiyege qarşı sert tedbirler ala bile, dep aytqan edi, lâkin şimdilik böyle bir şey ilân etilmedi.