Ukrayına prezidenti Volodımır Zelenskıy Kyivde Finlândiya prezidentinen körüşip, Rusiye akimiyeti qoşma seferberlikni azırlay, dep bildirdi. Onıñ malümatına köre, iyünniñ birine qadar Rusiye ordusına daa 300 biñ insan seferber etilecek. Kreml vekili Dmitriy Peskov Zelenskıynıñ aytqanlarını «doğru degil» dep adlandırdı, dep yaza «Nastoyaşçeye Vremâ» telekanalı (Amerikanıñ Sesi iştirakinen RFE/RL şirketi tarafından quruldı).
«Verstka» neşiri Rusiye prezidenti Vladimir Putinniñ memuriyetinde olğan menbalarğa esaslanıp, Rusiye Mudafaa nazirligi eñ yaqın vaqıtta cenkke daa 300 biñ insannı yollamağa planlaştıra. Jurnalistlerniñ malümatına köre, birinciden yedekçiler olacaq.
Rusiye Mudafaa nazirligi bildirgenine köre, soñki vaqıtları añlaşma imzalamağa istegenlerniñ sayısı «Crocus City Halldaki» terakt sebebinden «bayağı arttı». Rusiye şeerlerinde namzetlerniñ ekseriyeti martnıñ 22-nde faciada elâk olğanlar içün intiqam almağa isteyler dep bildire.
Rusyiede seferber etilgen yedektekiler, nümüneviy fotoresim
Hatırlatayıq, «İslâm devleti» terror teşkilâtı «Crocustaki» ücüm içün mesüliyetni öz boynuna alğanına baqmadan, Rusiye memurları ve Putin «Kyiv rejiminiñ» alâqası bar olğanını ayta. Kyiv bu qabaatlavlarnı red ete.
Arbiy-siyasiy ekspert, Praga belediye universitetiniñ professorı Yuriy Fedorovnıñ aytqanına köre, Zelenskıynıñ 300 biñ insanlıq seferberlik aqqında aytqanları – «Rusiye Mudafaa nazirliginiñ kerçek planlarıdır». Diger mesele ise ne vaqıt yerine ketirilecek, dep ayta ekspert.
Rusiye seferberlik sistemasında haos çıqarır ve yoq eterYuriy Fedorov
«Aman-aman eki ay içinde daa 300 biñ insannı askerlikke almaq – imkânsız, bu Rusiye seferberlik sistemasında haos çıqarır ve yoq eter», – dep eminliknen ayta Yuriy Fedorov.
Onıñ aytqanına köre, birinciden keçken sene «añlaşma imzalamağa razı olğan, bir şeyler vade etkenler» askerlikke alınacaq. Yedekte olğan böyle insanlar ilk nevbette askerlikke alınacaq.
Fedorovnıñ fikirince, qalğanlarnı «çeşit yollarnen» añlaşma imzalamağa mecbur etecekler: «Esas delil böyle: «Sizni, ne de olsa, cenkke ya da sıñır vilâyetlerine yollaycaqmız – Belgorod, Kursk, Brânsk vilâyetlerine – anda aman-aman cenkte olacaqsıñız, amma anda aylıqları, imtiyazları olmaycaq. Añlaşma imzalasañız ise, çoqça para alacaqsıñız».
Seferber etilgen rusiyeliler, nümüneviy fotoresim
Rusiye Federatsiyasınıñ Mudafaa nazirligi malümatına köre, soñki 10 künde añlaşmanı tahminen 16 biñ vatandaş imzaladı, yılnıñ başından – 100 biñden çoq insan. «Agentstvo» neşiri keçken sene ve bu yıl añlaşma imzalağanlarnıñ sayısını qıyasladı. Mudafaa naziri Sergey Şoygu bildirgenine köre, 2023 senesi añlaşmağa «aman-aman 540 biñ» insan toplandı. Böylece, er kün orduğa 1479 yañı insan qoşuldı, demek. Bu yıl yanvarniñ birinden aprelniñ ekisine qadar añlaşma imzalağanlarnıñ sayısı künde 1087 insan ola bile, yani üçte biri az.
Fedorovnıñ aytqanına köre, Rusiye Harkivge qarşı ücüm azırlamaycaq, «büyük ihtimalnen ücüm cenüiy operatsion alanda olacaq». «Zaporijjâ, Dnipro ve Pavloğradqa ücüm etüv ıntıluvı ola bile, bu sanayı üç köşeni zapt etüv ıntıluvı olacaq. Anda Ukrayınanıñ pek çoq sanayı imkânları, ilmiy-tehnik imkânları bar», – dep tüşüne arbiy-siyasiy ekspert.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.