Ukrayina prezidenti Volodımır Zelenskıy bugün Hersonda buluna – şeerniñ Rusiye ordusından azat etilgeniniñ üçünci yılında.
“Bugun Hersonda. Şeerniñ rusiyelilerden azat etilgeniniñ üçünci yılı – işğalciler mından qaçtı, ve hatırlağanımız kibi, insanlarımıznıñ cesareti bunı yaptı, şeerge – Herson şeerine Ukrayina bayraqları qayttı. Herson içün cenkleşken er bir askerimizge minnetdarım, bu acayip şeerni – insanlarımıznıñ ayatlarını qorçalağan er birine minnetdarım”, – dedi o, video muracaatında.
Zelenskıynıñ bildirgenine köre, bugün o, şeerde “telükesizlikten mesüliyetli olğan er kesnen” toplaşuv keçirdi.
“Daa çoq imaye olsun dep Hersonğa ne bermek kerek belgiledik. Rusiye dronlarınıñ bu şeerge qarşı er ay biñlernen darbesi daimiy telüke ola. Uçucısız sistemalarımıznıñ quvetleri, Madâr Quşlar ve diger bölükler mında imkânlarnı arttıracaq. Hususan imaye imkânlarını”, – dep qoştı Ukrayina prezidenti.
2022 senesi noyabrniñ 11-nde Ukrayina arbiyleri Hersonnı Rusiye işğalinden azat etti. Şeer, vilâyetniñ sağ yalısı kibi, büyük istilânıñ ilk künlerinden Rusiye kontroli altında edi. Herson işğalciler 2022 senesi fevralniñ 24-nden soñ zapt etken yekâne vilâyet merkezi oldı. Şeerniñ işğalden azat etilüvi Herson ücüm operatsiyasını toqtattı.
Şimdi Herson er kün Rusiye dronları ve toplarınıñ ücümlerine oğray, Ukrayina akimiyeti elâk olğanlar aqqında bildire.