Rusiyeniñ Rostov-na-Donu Cenübiy okrugınıñ arbiy mahkemesi «qırımlı musulmanlar davasınıñ» mabüsi Zekirya Muratovnı 11 yıl ve 6 ay sert rejimli koloniyada qalmasına üküm etti, dep bildire «Qırım birdemligi» cemaat birleşmesi.
«Müvekkilimiz başqa fikirde olğanı, faal vatandaş areketleri içün devlet tarafından taqip etile – göñülli edi, semetdeşlerine qarşı memuriy ve cinaiy davalar boyunca mahkeme oturışuvlarına bardı, şu sebepten halqara uquqqa köre mahkeme etilmeli, dep israr ete. Aynı bu sebepten Muratov Zekirya Saitoviç, qırımtatarı, musulman, Rusiye vatandaşı pasportını almağa mecbur olğan Ukraina vatandaşı özüni siyasiy mabüs dep saya», – dep bildirdi mahkemege advokatı Emine Avamileva.
Daa evel berilgen malümatqa köre, Rusiye polisiniñ hadimleri qırımlı Zekirya Muratov ve Vadim Bektemirovnıñ üküm çıqarıluvına kelgen üç vatandaş jurnalistini tuttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.