Rusiye mahkemesi "Hizb ut-Tahrir" diniy teşkilâtı ile alâqalarında qabaatlap 12 yılğa üküm etken 52 yaşında Qırım sakini Zavur Abdullayevni Vladimirdeki №2 apishanesindedn Tambov İK-1-ge avuştırdı. Bu aqta "Qırım birdemligi" cemaat birleşmesine apayı Emine Abdullayeva bildirdi.
Apishaneden qırımlı 2025 senesi dekabrniñ 13-nden çıqarıldı, bunı o, mektüpteki soy-soplarına haber etti. Bundan soñ Abdullayev Nijniy Novgorodqa keldi, anda bir qaç kün tranzitnen bulundı. Yıl soñunda onı Saratovğa ketirdiler. Anda er adam bütün bayram künleri qaldı. Ve tek bu yıl yanvarniñ 13-nde o, ömür arqadaşına telefon etip, onı Tambovğa tarif ettiler. Yanvarniñ 30-nda Abdullayev karantin kamerada yatqan soñ umumiy otrâdqa yollanıldı.
Abdullayevniñ ömür arqadaşı aqayı etapnı zor keçirdi, dep qayd etti.
"Amma o, bir vaqıt şikâyet etmey, er vaqıt ayta: "ElhamduliLlâh, er şey yahşı", – dep qayd etti Emine Abdullayeva.
Onıñ aytqanına köre, erkek sağlığına baqmağa devam ete: qan şekerini ve qan basımını teşkere, ilâclar ala.
Bıltır küzde haber etkenine köre, Zavur Abdullayev sağlıq vaziyeti pek fenalaşqanı içün tibbiy yardımğa muhtac. Onıñ II çeşit şeker hastalığı ve qan basımı qayd etildi.
Abdullayevniñ ömür arqadaşı Emine qayd etilgenine köre, aqayı qısmen baqılsa da, sağlıq vaziyeti fenalaşa, "hususan tiş ve közleri".
2021 senesi arnam ayınıñ 17-nde Aqmescit, Bağçasaray rayonlarında, Aqyarnıñ Balıqlava ve Nahimov rayonlarında qırımlı musulmanlarnıñ evlerinde tintüvler keçirildi. Rusiye uquq qoruyıcıları beş insannı tuttı: faaller Rustem Murasov ve Rustem Tairov, Cebbar Bekirov, faal Zavur Abdullayev ve Raif Fevziyevni.
Bağçasaray rayonınıñ Zalanköy (Holmovka) köyüniñ sakini Zavur Abdullayev terroristik teşkilâtnıñ faaliyetinde iştirak etkeninde ve akimiyetni küçnen zapt etmege azırlanğanında qabaatladılar. Onı 12 yılğa azatlıqtan marum etip, ilk 4 yılını apishanede ve azat etilgen soñ 1 yılınıñ sıñırlanmasına üküm etkenler. İstinaf mahkemesi ükmüni deñiştirmedi. Apiske alınmazdan evel Zavur Abdullayev mangalcı aşçı olıp çalıştı.