Şimdi Abdullayev Rusiyeniñ Vladimir vilâyetiniñ №2 apishanesinde tutula – «Vladimirskiy tsentral». Aqyardaki ekinci «Hizb ut-Tahrir davasınıñ» 51 yaşında mabüsiniñ II şeker hastalığı ve gipertoniyası qayd etildi. Endokrinolog baqmalı ve bazı taliller berilmeli.
«Közlerini baqtım – aqları tabiiy tüste degil. Endokrinolog üç yıl evelsi baqqan edi. Teşkerüv kerek, bazı ilâclar deñiştirilmeli», – dep tarif etti Emine Abdullayeva.
Apiste aqayınıñ közleri bayağı yaramay oldı, vitamin yetmegeni içün tişleri zarar kördi. Bazıları töküldi. Apishanede Zavurnı tek tiş çıqarğan tiş ekimi baqtı.
Bundan ğayrı, Zavur Abdullayev apayına apishanede mektüp almay, dep ayttı. «Türkiye ve Qırımdan yazğan ediler, amma alâ daa mektüp almadı», – dedi Emine Abdullayeva.
Uzun körüşüv iznini qadın belgilengen künden 10 kün ögüne aldı. Vladimir şeerine tren biletleri endi qalmağan edi. Emine hanımnıñ tarif etkenine köre, işğal etilgen Qırımdan 1,9 biñ kilometrde bulunğan şeerge maşinanen barıp çıqtı. Bir tarafqa yol bir kün sürdi.
Qırımtatarı onı apiske alınmazdan evel baqqan ekimler yazğan ilâclarını qorantasından almağa devam ete. Apishanedeki feldşer de bir qaç ilâc yazdı, olarnı da tuvğanları alıp yollay.
2021 senesi avgustnıñ 17-nde Aqmescit, Bağçasaray rayonlarında, Aqyarnıñ Balıqlava ve Nahimov rayonlarında qırımlı musulmanlarnıñ evlerinde tintüvler keçirildi. Rusiye uquq qoruyıcıları beş insannı tuttı: faaller Rustem Murasov ve Rustem Tairov, Cebbar Bekirov, faal Zavur Abdullayev ve Raif Fevziyevni.
Bağçasaray rayonınıñ Zalanköy (Holmovka) köyüniñ sakini Zavur Abdullayev terroristik teşkilâtnıñ faaliyetinde iştirak etkeninde ve akimiyetni küçnen zapt etmege azırlanğanında qabaatladılar. Onı 12 yılğa azatlıqtan marum etip, ilk 4 yılını apishanede ve azat etilgen soñ 1 yılınıñ sıñırlanmasına üküm etkenler. İstinaf mahkemesi ükmüni deñiştirmedi. Apiske alınmazdan evel Zavur Abdullayev mangalcı aşçı olıp çalıştı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.