Rusiye mahkemesi 17 yılğa üküm etken «Hizb ut-Tahrir davasınıñ» mabüsi, qırımlı Enver Seytosmanov Rusiyeniñ Rostov-na-Donu SİZOsından Başkortostan koloniyasına avuştırıldı. Bu aqta advokat Emil Kurbedinov «Qırım birdemligi» cemaat birleşmesine haber etti.
«Bulunğan yerinen bağlı muracaat yolladıq. İyünniñ 3-nde tahminiy bulunuv yeri aqqında haber aldıq – Başkortostan Cumhuriyeti», – dedi Kurbedinov.
Advokatnıñ aytqanına köre, Seytosmanovnıñ bulunğan yeri uzun zamandır belli degil edi.
«Bu cumhuriyetniñ penitentsiar sistemasınen belli problemlerimiz bar. Anda tutulğan diger mabüsler aqqında da malümat almaq içün Prokuratura reberligine ve Cezalarnı yerine ketirüv federal hızmetine muracaat etken edik. Em Ruslan Zeytullayev, em ağa-qardaş Abdullayevler, em digerleri anda tutula», – dedi o.
Rusiye Arbiy istinaf mahkemesiniñ qadısı Anatoliy Solin «Hizb ut-Tahrir davası» mabüsi olğan Aqyar sakini Enver Seytosmanovnıñ ükmüni deñiştirmedi.
2019 senesi dekabrniñ 5-nde Rostov-na-Donu Cenübiy okrugınıñ arbiy mahkemesiniñ qadıları aqyarlı qırımtatarı Enver Seytosmanovnıñ ükmüni çıqardı. Onı bir yıl azatlıq sıñırlanmasınen 17 yıl sert rejimli koloniyada qalmasına mahküm ettiler.
Rusiye quvetçileri ağa-qardaş Ernes ve Enver Seytosmanovlarnı 2018 senesi mayısnıñ 10-nda Aqyarnıñ Balıqlava rayonınıñ Hayto (Tılovoye) köyünde tintüvlerden soñ tutıp alğan edi.
Ernesni daa soñra yiberdiler, Enverge ise cinaiy dava açılğanı aqqında haber etildi. Onı Rusiye Ceza Kodeksiniñ 205.5 maddesine (terror teşkilâtınıñ faaliyetini teşkil etüv ya da iştirak etüv) istinaden qabaatlaylar.
«Memorial» aq qorçalayıcı merkezi Seytosmanovnı siyasiy mabüs olaraq tanıdı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.