“Yüz rubleliklernen yol töşemek mümkün”. Aqmescitte yollarnı kene tamir eteler

İyünden başlap Aqmescit yollarını 390 million rublege tamirleycekler. Bunı rusiyeli şeer memuriyetiniñ başı muavini Pavel Kuznetsov bildirdi. Onıñ aytqanına köre, şeer büdjetine aqça “Havfsız ve keyfiyetli maşna yolları” programması neticesinde ayırıldı

Umumen bu leyha çerçivesinde Aqmescitniñ 26 soqağınıñ tamirlevi közde tutula. Bundan ğayrı, memurlar bildirgenine köre, Rusiye prezidenti yedek fondunıñ aqçasına, Aleksandra Nevskogo, Karla Marksa, Selskoy soqaqlarında yol töşemesiniñ temelli tamiri yapılacaq. Keçken yıl Aqmescit yol tamirlevine 1,5 million ruble masraf etti, amma memurlar icracılarnıñ işinden memnün qalmadı.

“Aqmescit cemiyetiniñ birleşmesi” birleşiminiñ başı Sergey Dudçenko, şeerniñ rusiyeli akimiyeti yol tamiri meselesinde şeerlilerni hoş qaldırmadı, dep saya.

- Pek çoq aqça masraf etildi, amma istenilgenniñ 40%-ı tek yapıldı. Tamir etilgen çoqusı yollarnı memuriyet atta qabul etmedi - er yerde hata-qusurlar, keyfiyetsiz materiallar. Ne olsa da, amma qabarcılıq alâ daa sıq-sıq rastkele. Yañçıq, bir ay evelsi, iş keyfiyetine qıymet kesüv komitetiniñ vekili qabarcılıqta tutuldı. Er şeyni paranen, yalannen, hızsızlavnen çezeler, yapılğan işiniñ federal közetüvi yoq. İçtimaiy nezaret de yetmey. Kollektivnıye Sadı qasabasında yolğa 340 million ruble ayırıldı, büyük keyfiyeti olacaq dep, federallar, Nazirler Şurası, memuriyet teşkerecek, dep işandıra ediler. Nezaret olğance, bir coruq yapa ediler, amma soñ - graviy yerine qurucılıq çöplügi, er şeyni tayaqlardan, çöplükten yapa ediler.

Aqmescitte yol tamiri, oktâbr, 2018 senesi

Böyle işlerni yapmaq içün mahsus Rusiyeniñ türlü bölgelerinden icracılarnı tutalarm çünki olarnıñ soñ ucu-bucunı tapmaq pek qıyım, dey Sergey Dudçenko.

- Yerliler bu işke celp etilmey, er şeyni başqa yerden kelgenler - gastrabayterler becere. Neticede ise böyle ola: yaptılar ve kettiler, siz ise istegeniñiz kibi qullanıñız. Bütüni mahinatsiyalar ve aqça aqlaması. Aqmescit, asıl da, paytaht, amma yapılğan iş keyfiyetine köre artta qala. “Tavrida”da ne yapılğanını baqıp turam - bam-başqa. Anda qatlamlar körüne, keyfiyetli materiallar, iş tehnikası, adamlar - mütehassıslar. Aqmescitte ise nasıldır klounlar, bu nasıldır saçmalav. Beş yıldan berli olğanı - para aqlaması. Aksönov köre, o soqaqlarnı keze, amma susmaq mecbur. Ya ne aytsın? Bütün bu icracılar Şeer şurasında oturışı. Sakinler şikâyet ete, amma 90% meselelerde boş cevap alalar.

“Yol areketiniñ havfsızlığı teminatı” rusiye cemiyet sistemasınıñ başı Konstantin Krohmal, alçaq yol keyfiyeti içün mesüliyetli memurlarnı cezalamaq kerek, dep saya.

- Yollar yaramay olğanı meni şaşırtmay. Men bütün şu memurlarnı bir yük maşnasına oturtıp, Bağçasaray taraflarında sekiz saat yürgüzer edim, yanları yahşı etip urulsın dep. Bundan soñ yolları güzel olğan Afrika memleketlerini kösterir edim. Qıtayda kibi, yaramay yollar içün atar edim. Menimce, ciddiy bir nezaret kerek. Memur bir ruble bile alıp, yolğa masraf etmese - arqası terlesin. Böyle meseleler çıqsa, demek yolbaşçı qabaatlı, o, bütün hadimlerini toplap, olar bu işke ciddiy yanaşsın dep kesen-kes aytmalı. Ne qadar aqça ayırıla - aqılğa zarar! - o 100 rubleliklernen Köktöbelden Novıy Svetkece yol töşemek mümkün.

Испытание ремонтом. В Симферополе продолжается реконструкция дорог (видео)

(Metinni Vladislav Lentsev azırladı)