"Sarı şerit" areketiniñ faalleri Aluştada şeer soqaqlarında yürek şeklinde sarı-mavı stikerlerni tarqatmaq içün yañı aktsiyanı keçirdiler, dep haber ete areketniñ telegram kanalı.
"Soqaqlarda Ukrayinanıñ timsalleri daa çoq peyda ola, sarı-mavı şeritler ve stikerler ise şeerimizge kerçek ruhunı qaytarmaqta. Bu meni ümüt ve Qırımımıznıñ tezden azat etilecegine işanç ile toldura. İşğal etilgen topraqta er kün, er bir küçlü tirenüv areketinen büyük ğalebege yaqınlaşqanımıznı is etem", — dep tarif etti Aluştadaki areketniñ faalleri.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faal ola, hususan Aqmescit, Yalta, Kezlev ve Kefede, soñki vaqıtları ise olarğa küçük şeerlerniñ Simeiz, Balıqlava sakinleri qoşula.
Areketniñ eñ belli aktsiyalarından biri — sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boiko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.