Qırımda fevralniñ 12-nde tintüvlerden soñ tutulğan Bağçasaraylı aşçı 40 yaşında Yunus Suleymanov apiske alındı ve Aqmescitteki tahqiqat izolâtorına qapatıldı. Bu aqta vaziyetten haberdar olğan menba "Qırım birdemligi" cemaat birleşmesine tarif etti.
Şimdi Suleymanov SİZO-2-de buluna, anda o, 40 yaşını toldurdı. Aynı SİZOda aynı künde tutulğan Nariman Seytaliyev de tutula.
Apiske alınğan qırımlılar – farqlı davalarnıñ mabüsleri. Seytaliyev ve Suleymanov Rusiyede yasaqlanğan, amma bir çoq memlekette faaliyetine izin berilgen "Hizb ut-Tahrir" siyasiy firqası ile alâqalarında qabaatlana. Erkekler bu yıl aprelniñ 11-ne qadar apiske alındı.
Hatırlatamız, Rusiye uquq qoruyıcıları fevralniñ 12-nde Qırımnıñ Bağçasaray rayonınıñ Ulaqlı (Glubokiy Yar) köyünde 42 yaşında Nariman Seytaliyevniñ ve Bağçasarayda aşçı Yunus Suleymanovnıñ evini tintti. Saba dörtte başlağan tintüvler bitken soñ ekisini alıp kettiler.
Aqmescitniñ Kiyev rayon mahkemesi erkekniñ sıñırlav tedbirini belgiledi. "Hizb ut-Tahrir" islâm siyasiy firqasınıñ faaliyetini teşkil etkeninde qabaatlanğan (Rusiye Federatsiyası Ceza kodeksiniñ 205.5 maddesiniñ 1-inci qısmı) Seytaliyev aprelniñ 11-ne qadar apiske alındı. Onı 20 yılğa qadar azatlıqtan marum ete bileler.