Qırımdaki Rusiye mahkemesiniñ Qırım.Aqiqat frilanseri Vladislav Yesipenkoğa qarşı çıqarğan ükmü temyiz etilecek, dep bildirdi Qırım.Aqiqatqa Yesipenkonıñ apayı Yekaterina.
"Bu qanunsız qarar, elbette böyle bir qaranen razı degilmiz, onı temyiz etecekmiz. Vlad ayrtıq bir yıl qadar SİZO-da otura, FSB sisteması Vladnı qorquttı, vaqıtnı sozdı, davanı uydırdı. Amma er kesni qorqutmaq ve sustırmaq mümkün degil. Fevralniñ 15-nde munaqaşalar vaqtında advokatlarımız qabaatlarnı er taraflama yahşı etip baqtılar ve dava boyunca qabaatlarnı yoq ettiler. Bu davada bozuvlar ile bağlı yeterli qadar delil ketirildi. Elbette, FSB Vladnıñ qabaatını isbatlap oldı", - dedi Yekaterina Yesipenko.
Your browser doesn’t support HTML5
«С нуля образовалась граната». Адвокат Владислава Есипенко Дмитрий Динзе о подробностях дела и судебном заседании
Rusiyeniñ nezaretinde olğan Aqmescit rayon mahkemesi Qırım.Aqiqat frilanseri (Azatlıq Raziosınıñ leyhası) Vladislav Yesipenkoğa üküm çıqardı. Rusiyeli mahkemeci Dlâver Berberov jurnalistni 6 yıl sert apis cezasına ve 110 biñ para cezasına mahküm etti. Evel qabaatlav tarafı Yesipenko içün 11 yıl apis cezasını istegen edi.
Keçenlerde mahkeme oturışı vaqtında Yesipenko soñki sözüni ayttı. O, "XXI asırda iskenceler ve tehditler qabul etilmez", dep bildirdi.
Azat Avropa Radiosı / Azatlıq Radiosınıñ (RFE/RL) prezidenti Jeymi Flay Yesipenkonı "deral azat etmege" çağırdı.
Rusiye akimiyeti Vladislav Yesipenkonı patlayıcı cihaznıñ qanunsız sürette taşığanında ve saqlağanında qabaatlay. O 2021 senesi mart ayında Qırımda FSB hadimleri tarafından yaqalandı.
Vladislav Yesipenko davası
Vladislav Yesipenko – Azatlıq Radiosınıñ (Qırım.Aqiqat leyhası) ştattan tış jurnalisti (frilanser), içtimaiy ve ekologik meselelerni aydınlatqan, qırımlılarnıñ soravlarını çıqarğan edi. 2021 senesi martnıñ 10-nda Qırımda Rusiye FSBsiniñ hadimleri tarafından tutuldı. «Ukraina mahsus hızmetleriniñ menfaatları içün» malümat toplağanında ve maşinasında «elnen yapılğan patlayıcı cihaznı» saqlağanında qabaatlandı.
27 kün devamında Yesipenkonı mustaqil advokatlarnen körüştirmediler. Amma «Krım 24» Rusiye devlet telekanalı intervyüsını kösterdi: kanal saytında derc etilgen videoda Vladislav Yesipenko yarımadada Qırım.Aqiqat leyhası içün video çıqarğanını tasdıqlap, çıqarılğanlarnı Ukraina mahsus hızmetlerine de bergenini ayttı.
Mustaqil advokat kirsetilgen Aqmescitteki mahkeme oturışuvında Vladislav Yesipenko Rusiye mahsus hızmetleri tarafından oğratılğan işkence aqqında bildirdi. Anda Yesipenko tayin etilgen advokat Violetta Sineglazovadan vazgeçti. Mahkeme Yesipenkonı 2021 senesi mayısnıñ 11-ne qadar apiste qaldırdı.
Advokat Aleksey Ladinniñ aytqanına köre, Yesipenko mahkemede işkence aqqında aytqan soñ, Rusiye FSBsiniñ hadimleri «onı öldürirler», dep qorquzdı.
Ukraina tış istihbarat hızmeti Qırım.Aqiqatqa cevap berip, FSBniñ Vladislav Yesipenkonıñ Ukraina mahsus hızmetlerinen yapqan işbirligi aqqında "provokatsiyasını izaatlamay», dep bildirdi. Qırım Muhtar Cumhuriyetiniñ prokuraturası Qırımda Vladislav Yesipenkonıñ tutıp apiske alınmasınen bağlı cinaiy tahqiqat başlattı.
Rusiye quvetçileri Vladislav Yesipenkoğa qarşı tahqiqat tedbirleri aqqında resmiy malümat bermey.
Ukraina Tış işler nazirligi, Ukraina ombudsmanı, Avropa ve Halqara jurnalistler federatsiyası Vladislav Yesipenkonı acele azat etmege çağırdı.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırıp, SAR/AR Qırımda tutulğan Qırım.Aqiqat frilanseri bildirgen işkencege açuvlana, dep bildirdi.