Sentâbr 16-sında Rostov-na-Donu şeerindeki Cenübiy arbiy bölge mahkemesi ekinci Bağçasaray "Hizb ut-Tahrir davası" boyunca qarar çıqardı - yedi adamğa umumen 110 yıllıq apis cezasını üküm ettiler.
Böylece, Marlen Asanovğa şiddetli koliniyada 19 yıl üküm etildi; Memet Belâlovğa şiddetli koliniyada 18 yıl ve 1,5 yıllıq sıñırlav üküm etildi; Timur İbragimovğa - şiddetli koliniyada 17 yıl ve 1,5 yıllıq sıñırlav üküm etildi; Server Zekiryayevge şiddetli koliniyada 13 yıl üküm etildi; Server Mustafayevge şiddetli koliniyada 14 yıl ve 1 yıllıq sıñırlav üküm etildi; Seyran Saliyevge - şiddetli koliniyada 16 yıl ve 1 yıllıq sıñırlav üküm etildi; Edem Smailovğa şiddetli koliniyada 13 yıl ve 1 yıllıq sıñırlav üküm etildi.
Ernes Ametov qabaatsız tanıldı ve mahkeme binasında azat etildi. Onı qadını Eleonora Ametova, aqaynıñ azat etilecegi aqqında mahkeme binasında bilgenini ayttı.
"Bir kün evel bütün soylarımıznen Rostovğa yol aldıq, qarar oqulğanda bina içinde edim. Aqayımnen başladılar, mahkemeci Erneske qarşı beftan olğanını köstergen bütün dava malümatlarını seslendirdi ve o qabaatsız tanılğanını ilân etti, ve mahkeme onıñ mahkeme binasında serbest etilmesine qarar berdi. Men, kerçekten aytsam, ne olğanını birden añlamadım, iç kimse bunı beklemedi. Şimdi binanıñ yanında tışarıda turam, Ernes advokatlarnen çıqacağını ayttılar. Onı öz közümnen körmegence, alâ daa inanmayım", - aytıp berdi Qırım.Aqiqatqa Eleonora Ametova.
Ernes Ametov
«Deşetli apis müddetleri»
Ukraina Tış İşler Nazirligi, ekinci Bağçasaray "Hizb ut-Tahrir davası" boyunca mabüslerniñ ükmü ile bağlı qatiy bir itiraz bildirdi.
"Terror faaliyeti ile bağlı açıq şekilde uydurma qabaatlavlarnen azatlıqtan marum etme müddetleri, işğalci devletniñ antiterror qanunlarınıñ qırımtatar halqınıñ vekillerine qarşı sistemli siyasiy repressiya ve diniy diskriminatsiyanı gizlemek içün nasıl faal qullanılğanınıñ kösterme şaatlığıdır", - denile beyanatta.
Ukraina Tış İşler Nazirligi halqara topluluq Rusiye mahkemesiniñ qararına cevap bermege ve sanktsiyalarnıñ qullanuvı ile Rusiyege qarşı basqını arttırmağa çağırdı.
Ukrainanıñ vaqtınca işğal etilgen topraqlarınıñ yañıdan integratsiya nazirligi "qanuinsız olaraq apis etilgen qırımtatarlarğa qarşı qanunsız, siyasiy sebepli cezalar" bergen şahıslarğa qarşı daa sert halqara sanktsiyalar qullanmağa tırışacaq.
Nazirlikniñ matbuat hızmeti haber bere ki, bunı Ukrainanıñ Vaqtınca işğal etilgen Topraqlarnıñ yañıdan integratsiyası naziriniñ müavini İnna Golovançuk Maydan Nezalejnosti meydanından ekinci Bağçasaray "Hizb ut-Tahrir davası" boyunca destek aktsiyası vaqtında ayttı.
Golovançuknıñ aytqanına köre, sanktsiya cedveline yedi qırımtatarnı maküm etken rusiye prokuror ve mahkemecileri kirmeli. Bundan ğayrı o, nazirlik qırımlılarnıñ azat etilmesi ve evlerine qaytarılması içün küreşecegini qayd etti.
«Bu siyasiy taqibat»
Ukrainanıñ baş konsulı Taras Malışevskiy, Rusiyeniñ Rostov-na-Dinu şeerindeki Cenübiy Bölge Arbiy Mahkemesiniñ ekinci Bağçasaray "Hizb ut-Tahrir davası boyunca ükümge "siyasiy sebepli" dedi.
"Bütün Ukrainanıñ, bütün qırımtatar halqınıñ böyle müddetlernen bağlı ağrısını bölgeniñiz içün sağ oluñız. Men, baş konsul olaraq, tış işler naziri ve bütün ukrain akimiyet bütün meydançıqlarda - farqı yoq New Yorkmı, Strasburgmı, Jenevamı - bir er yerde aytacaqmız: qırımtatarlar qabaatsız, bu siyasiy taqibat ve o toqtatılmalı, mında qalğan adamlar azat etilsin dep bütün çarelerni körermiz", - dedi Taras Malışevskiy.
Taras Malışevskiy
«Tecavuzcı memleket terrornı toqtatacaq olmay»
Qırımlılarnıñ ükmüni ukrain ombudsmen Lüdmila Denisova da tenqit etti.
"Yedi adamğa şiddetli koloniyada 110 yıl - ekimci Bağçasaray "Hizb ut-Tahrir davası" boyunca Rostov mahkemesi tamam böyle qarar çıqardı. Sekizincini, Ernes Ametovnı, qabaatsız tanıp azat ettiler. Rusiye prokurorları qırımatatarlar yapmağan cinayetçilik içün qanunsız apis etmekni elde etti. Tecavuzcı memleket qırımatatarlarğa ve Ukrainanıñ başqa qanunsız tutulğan adamalrına qarşı tecavuzını toqtatacaq olmay", - yazdı Denisoba öz Telegram kanalında.
Lüdmila Denisova
Ukraina ombudsmeni halqara missiyalarınıñ, uquq qoruyıcı teşkilâtlarnıñ ve diplomatik korpusnıñ vekillerini, "Rusiyeni Ukrainanıñ qanunsız apis etilgen vatandaşlarınıñ qanunsı tutuluvı ve üküm etmesini toqtatmağa ve olarnı vatanğa qaytarmağa mecbur etmege" çağırttı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.