Yazıcı Timur Pulatov meşur qırımtatar alimi ve cemaat-siyaset erbabı Bekir Çoban-zade aqqında roman yazdı. Bu aqta o, Qarasuvbazarda qırımtatarlarnıñ ana tilininiñ inkişafına bağışlanğan qırımtatar cemaatınıñ toplaşuvında tarif etti. Pulatov «Samuraylar teatri» adlı yañı kitabını taqdim etti, dep bildire Qırım.Aqiqat mühbiri.
«Ulu qırımtatar erbabı Bekir Çoban-Zade aqqında romanım azır, 2021 senesi onıñ basıluvı planlaştırıla», – dep ikâye etti Pulatov.
Tedbirde yigirmi qırımtatar cemaatçısı, hususan «Qırım» gazetasınıñ muarriri Bekir Mamut, Qırım insan aqları bağ gruppasınıñ koordinatorı Abdureşit Cepparov, Zuya qırımtatar mektebiniñ müdiri Alim Çolahayev, Qırımnıñ medeniy mirasını saqlav teşebbüs gruppasınıñ azası Eskender İlyasov, cemaatçı Talât İlyasov, jurnalist Pevat Zeti, «Serbest Qırım» cemaat areketiniñ faali Reşad Memetov, metsenat Şerif Osmanov ve digerleri iştirak etti.
Qırımtatar tili inkişafınen bağlı konferentsiya iştirakçileri, 2020 senesi sentâbrniñ 20-si
Sentâbrniñ 12-nde Aqmescitte Timur Pulatovnıñ qırımtatar tilinde «Samuraylar teatri» romanı taqdim etildi.
Özbekistan ve Tacikistan halq yazıcısı Timur Pulatov perestroyka zamanında qırımtatarlarnıñ tarihiy vatanına qaytuv ıntıluvlarına qol tutqan az sayıda sovet müneverleri sırasında edi.
Yazıcı emin ki, Qırımda qırımtatar sürgünliginiñ müzeyi yapılmalı.
Bekir Çoban-zade 1893 senesi Qarasuvbazarda dünyağa keldi. Türkiyede tasil alıp, Odessada oqumağa devam etti, soñra Budapeştte universitetniñ tarihiy-filologiya fakültetine oqumağa kirdi, doktorlıq dissertatsiyasını qorçaladı. 1920 senesinden başlap Aqmescitte Tavriya universitetiniñ şarqşınaslıq fakültetinde çalıştı, professor unvanını aldı. 1937 senesiniñ başında Bekir Çoban-Zade Baku universitetiniñ professorı, Sovet Sotsialistik Cumhuriyetleri Birliginiñ İlimler Akademiyasınıñ Azerbaycan filialınıñ hadimi edi. 1937 senesi yanvarniñ 28-nde professor tedaviylengen Kislovodskta tutqanlar. Bakuda olğan mahkeme 20 daqqa devam etti. Ölüm fermanı 1937 senesi oktâbrniñ 13-nde yerine ketirildi.