İşğal etilgen yarımadanıñ Rusiye akimiyetiniñ Qırım yarımadasınıñ suv teminlevi ile bağlı vaziyetni eyileştirecegine dair vadelerine baqmadan, kerçek vaziyet, Qarasuvbazar ve Taygan suv anbarları misalinde, bu suniy suv anbarlarında suv yedekleriniñ eksilgenini köstere. Bu aqta Qırım.Aqiqatqa Qarasuvbazarlı bir memleketşınas bildirdi .
Onıñ malümatına köre, qışnıñ soñunda Qarasuvbazar suv anbarı Qırımda eñ tolulardan biri edi, amma şimdi o pek tez saylaşıp kete.
"Bir qaç ay evelsi Qarasuvbazar suv anbarı o qadar tolu edi ki, qomşu Taygan suv anbarını da toldurdı. Amma soñra yuqarıdan buyruq keldi, çoq miqdarda suvnı Salğır ile beraber Şimaliy-Qırım kanalını toldurğan Büyük-Qarasuv özenine tökmek, anda ise Cenübiy-Şarqiy Qırımnıñ suv anbarları toldurıla. Bu kibi suv taşlav hızmeti ile Qarasuvbazar ve Taygan suv anbarlarından büyük çamurlar qalacaq", — dep tarif etti Qırım.Aqiqatqa yerli bir memleketşınas, onıñ soyadını muarririyet telükesizlik sebeplerinden aytmay.
Qarasuvbazar suv anbarı
Qırımnıñ rus akimiyeti öz informasion kün tertibinde kerçek vaziyetni deñiştirmege tırışa, dep qayd etti memleketşınas.
Taygan suv anbarı
"Soñki vaqıtları Qırımda informasion kün tertibi ne qadar küçlü olğanını körmek mümkün. Kerçek yerine, Qırımdaki suv, telükesizlik ile bağlı er şey yahşı olğanını bildirgen ve yalan aytqanlar bar, amma fiyatlarnıñ tez artqanı aqqında yalan aytmaq mümkün degil, mında er kes er kün tükânlarda kerçekni köre", — dep qayd etti o
Qırım yarımadasınıñ suv teminlevi ile vaziyet Şimaliy-Qırım kanalından Dnipro suvunıñ berilmesi toqtatılğan soñ fenalaştı. Suv qıtlığı meselesi Qırımda eñ kergin meselelerden biridir.